Minister di Enseñansa, Michelle Hooyboer-Winklaar, ta lamenta cu e informacion publica riba e situacion di Imelda Kleuterschool y st. Aloysius Basisschool, no ta cuadra cu realidad.
“Conform Landsverordening Basis Onderwijs, mantencion chikito, por ehempel touch up di verf, drecha porta, bentana of cosnan chikito y limpiesa regular ta cay bou responsabilidad di cada directiva di scol, pa cual ta ricibi fondonan den e norm bedrag cu ta wordo subsidia. Renobacionnan grandi, of trabounan cu ta mas complica ta responsabilidad di Gobierno. Loke nos ta mira ta hopi scol cu ta encontra problemanan chikito ta crece bira mas grandi ora no haci e mantencion chikito necesario. Inoficialmente nos a hasta wordo bisa cu e trabounan chikito ta wordo ignora y neglisha pa nan bira mas grandi pa forsa Gobierno paga e gastonan. Esaki ta di lamenta! Pasobra ta aumenta e fondonan publico pa inversion den mantencion a costo di otro proyectonan den Enseñansa”, asina Minister Michelle Hooyboer-Winklaar a bisa.
Pa loke ta trata Imelda Kleutershcool, durante aña escolar 2015–2016 e cabesante di e scol a indica cu ta sospecha cu por tin algo den su oficina cu ta dun’e reaccion alergico. A laga haci 2 “luchtmeting” cu no a constata nada in usual y a indica cu cualkier stof presenta, manera den tur edificio, ta dentro di e margennan aceptabel, contarario na e declaracion di director di SKOA!
Locual si a constata ta cu e scol ta sushi y no ta wordo “ontlucht” na un manera adecua. A bin compronde cu tabata tin solamente 1 werkster pa 4 ora pa dia cu consecuencia cu no ta suficiente pa haci full un scol debidamente limpi. Na niun momento a constata “schimmel” dañino na e scol aki. Loke si a constata, manera hopi otro scol cu tin decada sin mantencion adecuado, cu tabata reparacion cu ta necesario incluso tegelnan cu tabata los.
Directie Onderwijs a haci “opname” y ta preparando pa un destaho publico pa por laga drecha e diferente aspectonan na e scol y lo haci e trabaonan den “Herfstvakantie” na October. “Cada aspecto di esaki a wordo comunica na Director di SKOA como tambe e cabesante, pesey pa mi ta dificil pa compronde kico e meta di e declaracionnan publico haci door di e Director di SKOA tabata. Si tur informacion ta conoci y nos ta trahando hunto riba un solucion cu den mi concepto por a wordo evita cu un tiki mas atencion di parti di SKOA, e ta straña mi cu ta publica un noticia asina”, e Minister a bisa.
Pa loke ta trata St. Aloysius basischool, na aña 2015 a cuminsa haci “opname” pa pone asfalt nobo. Durante opname e cabesante a informa cu no ta unicamente e asfalt ta e problema sino cu ora awa yobe e plenchi ta yena cu awa. Tambe el a remarca cu mester haci algo cu e veld pariba di e scol ya cu esaki ta trece hopi stof cune. Un situacion cu ta existi desde cu a construi e scol decadanan atras. Na aña 2015, ya caba a aloca fondo di Gobierno pa drecha kolomnan cu ta wanta e dak, algo cu tabata den decadencia pa añanan.
DOW a traha riba e asfaltering y a purba haci esaki durante vakantie di scol, pero a conclui cu ta un trabao hopi mas grandi tin cu haci na e scol, cual no unicamente lo encera e schoolplein sino ful a parkeerplaats di e misa dilanti e scol. E manera con esaki ta construi ta cu tur awa cu bay riba e parkeerterrein di e misa, esun di Sta. Anna Basisschool, esun riba e veld di futbol ta bin caba riba e schoolplein di St. Aloysius. Otro proyecto cu e cabesante y SKOA ta completamente informa riba dje.
Director di SKOA a menciona cu e scol no tin airco. Algo remarcabel mirando cu den pasado, no mucho tempo atras, ora a purba di instala airconan nobo riba peticion di un scol cu a acerca Ministerio directamente, SKOA a manda un carta informando nos cu nos no por instala niun airco na niun scol cu ta resorta bou di SKOA, sin cu Gobierno para responsabel pa e gastonan adicional di coriente cu ta bin extra ora instala airco. Si Gobierno no ta autorisa pa pone airco, segun carta ricibi, nos ta spera e ora cu SKOA mes lo por cuminsa inverti den airco pa tur scol di SKOA cu falta esaki.
Den e ultimo 3 aña Gobierno di Aruba a inverti mas cu Afl. 16,000,000 den edificionan unda SKOA ta doño. Mi no ta kere ta rasonabel ni husto pa solamente mustra aspectonan cu ainda mester wordo drecha manera un tegel cu a lanta of un blafon cu mester verf y purba di duna e impresion cu no esaki no tin nos atencion. E realidad ta keda cu tur scol cu ta mas cu 20 aña, cu no a ricibi un mantencion regularmente, tin cosnan pa drecha. Esaki ta loke nos ta purbando di soluciona via un tipo di PPP cu lo por busca fondonan alrededor di Afl. 300,000,000 pa por drecha tur aspecto infrastructural den Enseñansa”, Minister Michelle Hooyboer-Winklaar a termina bisando.