Minister Michelle Hooyboer-Winklaar a reacciona riba e noticianan cu a sali den medionan di comunicacion recientemente tocante e aprobacion di e rector nobo pa Colegio Arubano. Di acuerdo cu e titular di enseñansa, el a confirma berdad Gobierno a informa SMOA cu e salario di e rector nobo cu nan kier nombra na Colegio Arubano no ta subsidiabel.
Minister Michelle Hooyboer-Winklaar a duna un splicacion tras di e decision aki bisando “Mirando cu e candidato cu SMOA a selecta no ta cumpli cu ley y reglanan existente relaciona cu subsidio, mi no por duna aprobacion pa esaki”.
Tin un carta cu a sali recientemente for di Departamento di Enseñansa riba e peticion di SMOA pa subsidio cu un conclusion negativo. Den e caso specifico aki e candidato tin 61 aña di edad, ta bin di exterior y e directiva di scol a ofrece un contracto di 5 aña.
E mandatario ta splica cu aunke SMOA tecnicamente por nombra e candidato cu nan selecta como cu nan ta un stichting independiente di Gobierno, pero den caso cu kier e salario wordo paga door di gobierno e candidato mester cumpli cu e ley y reglanan cu gobierno a stipula. Uzando otro fondonan di e scol pa cubri e salario di un Rector tampoco lo ta conforme principionan di bon “corporate governance” mirando cu e scol ta wordo subsidia gran mayoria door di Gobierno, nificando cu no lo por simplemente kita fondo for di otro caminda pa cubri e gastonan di salario.
Minister Hooyboer-Winklaar ta sigui splica cu a atende SMOA na mas cu un ocasion riba e ley y reglanan vigente pa ora di nombra un rector. Ta trata aki di loke tin stipula den entre otro e subsidieverordening, e ley y maneho nobo di pensioen, e bezoldigingsregeling di onderwijspersoneel y e uitzendregeling.
E titular di enseñansa ta enfatisa cu e ta e responsabilidad di cada directiva di scol pa tuma bon nota di e ley y di e reglanan existente pa ora di nombra personal y pa mantene nan mes na esaki. Ainda por corda con aña pasa SMOA a pasa den un situacion similar unda cu a firma contracto cu rector Hans Timmermans sin cu a consulta cu gobierno prome pa e subsidio. Den e proceso aki a resulta cu SMOA a neglisha y ignora varios ley y regla vigente pa loke ta suma di salario, edad y demas beneficionan secundario cu no ta aplicabel y cu Gobierno no ta subsidia.
Minister di Enseñansa ta lamenta cu SMOA den e caso aki atrobe no a haci su huiswerk prome cu a selecta e candidato y no a informa gobierno na tempo riba e proceso. “Mi ta kere cu por a evita di yega na e situacion aki na unda a cana henter e proceso cu un candidato pa descubri cu e candidato aki no ta cuadra cu ni e maneho ni e leynan stipula. Mi ta haya hopi lamentabel di a pesar di a splica esaki varios biaha, nos ta wordo confronta cu e situacion aki. Fuera di esaki, mi ta convenci cu tin candidatonan aki na Aruba mes cu si lo cumpli cu tur rekisito. Nos ta dispuesto, manera anteriormente comunica cu SMOA, pa traha hunto pa yega na un Rector nobo cu ta cumpli cu tur rekisito y por trece e liderazgo cu nos tur ta desea pa e scol”, Minister Hooyboer-Winklaar a termina di bisa.