Durante un ceremonia teni na Departamento di Enseñansa, Minister Michelle Hooyboer-Winklaar a presencia otorgamento di certificadonan na e diferente docentenan cu a participa den e proyecto di renobacion di educacion di formacion profesional. Un proyecto diseña pa Departamento di Enseñansa hunto cu e compania global CINOP y financia pa FDA.
“Awe nos ta akinan na Departamento di Enseñansa unda ta entregando diferente certificado na diferente personanan cu a yuda den e proyecto ‘een vernieuwing van ons beroeps onderwijs’ (un renobacion di nos educacion di formacion profesional), e curiculo cu ta encera e diferente tipo di programanan pa, entre otro, EPB, EPI y OAA cu tin di haber cu enseñansa vocacional. Esaki ta un proyecto cu a wordo financia door di FDA cu tin añanan den preparacion,” e ta bisa den su introduccion.
“Esaki no ta e final, pero si a entrega tur e diferente trabaonan cu a wordo haci te cu awor door di diferente gruponan di trabao cu a keda instala y cu tabata tin e tarea pa por produci nuebe programa nobo pa nos sistema di educacion di formacion di profesionalnan,” Minister Hooyboer-Winklaar a agrega.
Siguiendo riba e tema e mandatario ta splica cu e tabata un trabao hopi duro den e sentido cu tabata tin nuebe diferente tipo di experticio cu tabata tin mester pa por yega na diferente programanan y educacion cu ta yuda studiantenan pa no solamente ta exitoso den e programa pero cu tin un bon enlace cu e mercado laboral.
“Esaki ta keda un reto hopi grandi p’esey tabata tin un necesidad pa por bisti’e un bachi nobo y renoba tur e diferente programanan aki y esaki ta sigur un di e trabaonan cu a wordo haci den e ultimo aña y e lo tin un impacto hopi grandi pa nos studiantenan y mercado laboral,” e ta bisa. Nos ta hopi contento cu e trabao cu a wordo haci.
“Nos ta wak cu nos ta casi yegando na e final unda e programanan aki lo wordo implementa na e diferente scolnan manera menciona y sigur cu un efecto cu e diploma di EPB, EPI y OAA ta bay tin un diferente enfoke mirando cu Sector priva tambe tabata tin nan aporte na programa nobo nan aki. Esaki ta facilita e entrada di e studiante den mercado laboral como cu loke nan a siña na scol ta bay yuda y guia e studiante den e proceso pa haya trabao. Pa sector priva nan ta bay wak e diferencia tambe di esunnan cu lo sali for di e scolnan aki cu ta bay ta mas miho prepara pa e tipo di trabaonan cu por haya den nos mercado,” e Minister ta enfoca
“Nos ta hopi contento cu esaki y nos ta wak cu e trabao ainda no ta cla pero esaki sigur ta un di e momentonan hopi importante pa nos pa otorga pa medio di CINOP, cu ta e compania cu a yuda nos, e certificadonan na tur esunnan cu a participa na e training nan di ‘train de trainer’ el a agrega.
E fase di e proyecto aki a keda finalisa den 1 aña y e ta trata innovacion di educacion di formacion di profesionalnan na EPB, EPI y OAA (Openbare Avond Leergangen). E idea di e proyecto ta cu lo bay innova e parti di e programanan den un structura nobo enfocando riba un miho enlace dirigi mas riba e necesidadnan di e mercado laboral. Den e sistema aki e competencia cu e studiante mester tin ora cu e caba ta e base pa asina nan por drenta e mercado laboral mesora. E proyecto aki tabata tin e meta pa haya sa exactamente kico y na unda e cambionan mester bin.
“Esey ta e concepto di esaki y durante un aña largo a traha riba e parti di maneho como tambe riba un plan di termino largo pa cada scol combina cu un programa piloto di nuebe disciplina y tur esaki a sosode den un aña”, asina Director Suplente di Departamento di Enseñansa, Sheila Maduro a splica. Esaki ta e proyecto den su totalidad. Fuera di e parti aki e programa tambe ta encera un parti practico cu ta bay tin un rol mas importante como tambe e rol di e docente den forma di duna mas guia.
“Esaki a cuminsa a base di e idea di “competentie gericht onderwijs, (educacion dirigi riba competencia). E scolnan tabata tin e deseo pa bay den e direccion aki y pa medio di FDA nos a haya e oportunidad pa haci e innovacion aki hunto cu CINOP Global,” Maduro a agrega. E proyecto a encera diseño di disciplina nan nobo, en realidad dossiernan di cualificacion cu a inclui training tambe. “Esaki tabata encera con bo ta traha programanan, con ta diseña curiculo, entre otro y nos tabata tin train the trainers tambe,” e director suplente a splica. Un di e docentenan cu a haya oportunidad pa participa den e proyecto tabata (Yasmin Trott) di EPB San Nicolas cu a splica kico e experiencia tabata p’e.
“Despues di a haya un invitacion pa participa nos a cuminsa na januari hunto cu CINOP. E experiencia tabata uno sin igual unda cu nos a siña diferente aspecto for di desaroyo di curiculo, enseñansa y ehecucion y durante henter e aña nos tabata tin sosten di CINOP,” el a bisa. ‘Nos a haya e oportunidad pa forma parti di e vision y direccion cu e renobacion di educacion di formacion di profesionalnan lo mester ta”, asina Yasmin Trott a termina.
CINOP Global ta un compania internacional basa na Den Bosch, Hulanda. Nan meta ta pa crea programanan di educacion vocacional. Nan vision y mision ta pa contribui na siñansa di bida largo y pa traha conhuntamente cu un meta na mente: yuda hende desaroya den practica y tecnico y yuda fortifica educacion di formacion di profesionalnan rond mundo. Nan a yuda den innovacion den paisnan na Europa, Africa, Asia, Medio Oriente y Latino America. Nan ta kere cu cada individuo tin talentonan unico y tin e derecho riba un educacion propio.