“Inaceptabel”, esey tabata e prome reaccion di Minister Michelle Hooyboer-Winklaar despues di a tuma nota di e sucedido na Pieterboer College na San Nicolas. “Nos no lo tolera algo asina pasa bou di ningun circumstancian na esunnan cu ta educa muchanan, y e actitud di violencia aki na Scol lo carga consecuencia severo.” , asina e mandatario a duna di conoce.
Diabierna merdia un mayor a yega na e scol, a agredi un docente riba pleno tereno di scol, a herid’e te cu e mester a bay Hospital pa ricibi tratamento medico. E sucedido a haci un impacto grandi na e scol, tanto cu e docente, alumno y mayornan cu a lamenta masha e hecho aki. Y di banda di Ministerio di Enseñansa, nan a tuma accion mesora pa garantisa cu autoridadnan ta investiga e caso aki den forma profundo, pa evita cu tin ripiticion y pa por lo menos mengua e trauma cu tur di e scol ta bibando cune awor aki.
Violencia na porta di scol ta un asunto cu e ultimo añanan ta lantando cabes y ta traha duro pa preveni’e, pero den caso cu e sosode toch, lo percura pa cana tur e camindanan penal pa persigui esunnan responsabel. Ningun docente ta sali di nan cas mainta pa bay educa yiunan di hende, pa wanta ni insulto y pio agresion fisico. Na algun scol a laga pone siguridad, a construi curanan halto, sistemanan di alarma y mucho mas.
“Pero nos ta mas interesa den inverti den educacion, den buki di scol, en bes cu cada bes mester gasta mas placa na cosnan cu no tin nada di haber cu enseñansa mes. Ta keda na cada persona pa realisa cu educacion di nos yiunan ta primordial y e unico forma cu e trabou ta exitoso, ta si tin un bon coordinacion entre docente, mayor y e alumno”, di acuerdo cu Minister Michelle Hooyboer-Winklaar.
Na final e Minister di Enseñansa ta desea e docente pronto recuperacion y ta expresa su confiansa cu husticia lo sa di duna e caso aki e atencion máximo pa evita ripiticion y evita cu esaki por bira un tendencia.