“Nos ta cla y preparacionnan ta andando pa drecha tentnan, decora e luga y pa nos por yama pueblo bon bini diabierna awor”, asina Michelle Hooyboer-Winklaar, Minister di Enseñansa y Famia a duna di conoce diadomingo atardi na ocasion di e trabounan di preparacion andando na Green Square. Un rato cu e mandatarionan a presenta, mesora e luga a yega di siguidonan, sostenedonan y votadonan cu a bin duna un man pa decora, pa plak sticker y asina anticipa e evento dedica na e temporada aki di fin di aña.
Normalmente ta tene un concierto di speransa dilanti Cas di Partido, pero e aña aki e partido mas grandi y cu mas asiento den Parlamento a dicidi di muda pa Green Square y a cambia e concepto den un feria. “Mi ta invita henter pueblo di Aruba pa bishita nos diabierna awor, pa hunto nos celebra e dianan aki di union, di paz y di speransa”, asina e mandatario a enfatisa.
E evento ta tuma luga diabierna awor dia 16 di December cuminsando for di 7:00pm riba Green Square na e crusada di Adriaan Lacle Boulevard y L.G. Smith Boulevard. Entretenimento lo ta den man di Robert Maduro y su Alma Folklorico, Janiro “Ataniro” Eisden, Modechi y su grupo, Melodia y cu presentacion special di e banda di momento, “Buleria” cu lo compaña e cantante Izaline Calister. Tur esaki compaña pa un cantidad di DJ pa entretene henter e anochi.