Recientemente Minister Maduro a ricibi bishita di sr. Philippe Pelletier y sra. Nadezhda Sporysheva, representantenan di World Trade Organization Secretariat (WTO ) y sr. Pavlo Boroday di European Bank for Reconstruction and Development (EBRD) hunto cu ehecutivonan di Departamento di Economia (DEACI)
E ehecutivonan di WTO y EBRD a presenta un tayer tocante con mester cumpli cu e ‘Government Procurement Agreement (GPA) y con pa delinea e maneho di destaho publico. E tayer aki a wordo organisa pa DEACI.
Durante e bishita na e mandatario, e expertonan di GPA a enfatisa riba e beneficionan di e GPA di WTO cu ta brinda un sistema mas transparente y competitivo cu ta motiva negoshinan local chikito y mediano pa participa cu contratonan y tambe esnan den exterior. Alabes a brinda e dignatario un splicacion con e sistema ta traha y e importancia di e coleccion di data. E ehecutivonan di WTO lo asisti Gobierno pa prepara un sistema pa colecta e data pa asina por traha rapportnan estadistico pa Gobierno por cumpli cu e regla di WTO. Pa e motibo aki e expertonan lo reuni cu varios departamento di Gobierno.
Minister Maduro a gradici e ehecutivonan di WTO y EBRD pa nan cooperacion pa por a bini Aruba pa ofrece e tayer importante aki pa Aruba tambe por cumpli cu e reglanan internacional di destaho publico. Tambe e mandatario a gradici e ehecutivonan di DEACI pa nan cooperacion.