Den diferente medionan di comunicacion a sali un publicacion di sra. Sue-Ann Ras parlamentario di MEP na unda cu e imprecion por wordo crea cu Minister Lampe no a haci suficiente encuanto un caso di malversacion di fondo publico na un scol di Stichting EPB ( SEPB). Pa evita cu e imprecion eroneo aki keda circula ta importante pa informa e pueblo cu datonan correcto y no tendencioso. Pa cuminza ta bureau di Minister Lampe a exigi y a insisti pa haci un inspeccion na EPB Hato, mirando cu kehonan tabata drenta di añas caba y e maestronan no tabata haya oido serca e Ministernan anterior. A base di e inspeccion a bin resulta cu tin añanan sin haci inversionan desea pa cu e parke di machine, cu ta wordo usa pa duna les, na EPB Hato. Porcierto por menciona, cu tin machinenan cu a ser usa den tempo di JFK scol. Fuera di esey tambe a constata cu a neglisha pa haci ajustenan necesario pa tin y mantene e calidad y seguridad di tur esnan cu ta atende e scol na Hato sea como studiante o como docente. Encuanto e malversacion di fondo publico, na momento cu Minister Lampe a a wordo informa cu tin indicacion cu un fraude ta tumando lugar, Minister Lampe ta exigi e bestuur di SEPB un splicacion extenso di e asunto ya menciona. Den su turno bestuur di SEPB a contrata un compania priva externo y experto pa loke tabata necesario pa haci un investigacion y traha un rapport mas extenso. Na momento cu Minister Lampe ta ricibi e rapport al respecto, e a manda esaki di inmediato pa Landsrecherche pa inicia e proceso di investigacion penal. Minister Lampe ta keda den contacto estrecho cu e bestuur di SEPB pa sigui monitor e pasonan cu tuma, pa evita cu un caso asina bolbe ripiti su mes. Referente pa cu esaki a zorg pa entre otro tin descripcion di e procesonan obligatorio y necesario acredita. Pa cu esaki Minister Lampe ta coopera pa crea e posibilidad pa fortifica e departamento financiero di SEPB debidamente. Tambe a reenforza e bestuur di SEPB cu algun miembro nobo, cu tin entre otro e tarea explicito pa salvaguardia un maneho segun bon gobernacion. Minister Lampe ta di opinion cu placa di pueblo ta sagrado y ta pesey e ta haci su maximo esfuerzo cu fondonan publico, wordo usa debidamente. Di biaha Minister Lampe ta spera di haya sosten di sra. Ras y di tur e otro parlamentarionan, sea den coalicion como den oposicion, pa duna apoyo y acorda e inversionan cu lo mester haci den un futuro cercano pa cu e parke di machine na EPB.