E di 61 sesion di Commision on the Status of Women a habri dia 13 di Maart na Nacionan Uni, y manera custumber tur aña, Reino Hulandes ta presenta un “statement” durante e sesion hunto cu mas cu 180 pais rond di mundo. E reunion na e Headquarters na New York ta e reunion di mas grandi tur aña cu ta dedica na debati, dialoga y trece solucionnan pa diferente tema cu ta afecta hende muhe rond di mundo. E aña aki e sesion ta dedica na “Women’s economic empowerment in the changing world of work.”
Encabesando e delegacion di Reino Hulandes, Minister Hooyboer-Winklaar a duna un declaracion cu a enfoca riba e punto di bista riba e tema pa loke ta regarda Aruba, Hulanda y Reino en general.
A duna ehempelnan concreto di e forma cu ta purba stimula mas poder economico pa nos hende muhe aki na Aruba, specialmente esnan mas vulnerabel.
Banda di e Asamblea General, Minister Hooyboer-Winklaar a habri un “side event” patronisa door di Reino riba e tema “Intersectionality: An Inclusive Approach to Gender Equality”.
Y finalmente a asisti E Embahador Hulandes na New York durante su presentacion na e UN Security Council riba e topico “Combatting Human Trafficking and Ending Modern Slavery”.
“Pa mi tabata un honor y placer di por a lidera e delegacion y enfatisa na Nacionan Uni e compromiso cu Reino Hulandes tin pa stimula hende muhenan pa progresa economicamente, pa den futuro nan ta miho para riba nan propio forsa financiero y no mester depende necesariamente riba un ser masculino. Aki nos ta traha conhuntamente cu CEDEHM, Departamento di Asuntonan Social y Fundacion Hende Muhe den Dificultad, otro NGO’s pa logra nos meta.