Manera ya ta conoci, Minister Glenbert Croes a percura pa pone Enseñansa pa Empleo bek riba pia ampliando e cantidad di cursonan pa yuda e persona recapacita su mes conforme e demanda laboral.
Na mes momento ta enfocando riba cursonan cu por yuda tur hende provee pa su mes, su famia y si por hasta pa comercio. EPE den cooperacion cu Santa Rosa, ta instruyendo esunnan interesa con pa bira agricultor di tur locual cu aki na Aruba mes nos por cultiva.
3 di maart ultimo, e prome grupo di cursistanan di Horticultura a termina e curso cu exito. Sra. Sabine de Groot den nomber di EPE y di Minister Glenbert Croes, a entrega na cada graduado su certificado.
Manera a menciona anteriormente, e curso di Horticultura ta un colaboracion entre Enseñansa pa Empleo y Santa Rosa.
E curso ta wordo parti den 2 parti, cual ta teoria y practica.
Ambos ta wordo ofreci na Santa Rosa y pa practica diferente sitio di agricultura y plantacion ta wordo bishita.
E teoria ta pa siña e cursistanan e mihor tecnica pa planta y cultiva, mientras e practica ta pa realmente siña planta, explora e diferente tecnicanan y tambe diferente tera di cunucu y pa cual producto e tera ta apto.
“Nos ta sumamente contento y orguyoso cu e grupo a logra nan meta di completa e curso aki cu exito y nos ta spera cu tin mas interes pa sigui cu e curso di horticultura cu por bira un pilar importante den economia di Aruba”, Minister Glenbert Croes a expresa.
E siguiente curso lo inicia dia 3 di April proximo. Si ta interesa por yama EPE libremente na 5825662. Bishita e website di www.epearuba.com of via facebook @Enseñansa pa Empleo.
