Parlamentario drs. Mervin Wyatt-Ras a tuma nota di declaracion di minister Glenbert Croes den prensa. Segun Wyatt-Ras envez e minister aki traha y soluciona e “crisis social” cu e y su partido a crea e ta hunga cu sentimento di esnan vulnerable den nos comunidad.
Segun Wyatt-Ras minister mester entrega e ley di e fondo di crisis social na Parlamento pa ser trata. Envez di esaki e minister aki despues di papia un aña largo cu tin crisis social te ainda no tin solucion, sino ela lanza logo di crisis social pa awor e bai promove kico ta crisis social. Dicho crisis social a ser ocasiona dor di medidanan cu gobierno MEPPORRED a tuma pa castiga nos pueblo, especialmente esnan mas vulnerable. Anto e placa aki ta ser malgasta dor di gastonan di luho di gobierno y nombramento di nan mesun hendenan. Raad van Advies den nan reaccion ariba presupuesto 2018 y 2019 y CaFT tambe ta mustra ariba subida di gastonan di gobierno pa explotatie y pa personal apesar di a tuma medidanan. CaFT ta mustra tambe ariba e falta di control di e fondo di crisis social den presupuesto 2019.
Ta increibel ci minister Glenbert Croes a anuncia cu e lista di espera di sociale Zaken a aumenta di 2 luna den gobernacion di AVP pa 2 anja den gobernacion MEPPORRED. Pues envez di busca solucion ta aumenta problema dor di no haci nada. Pero aki ta e wega politico pa e por papia cu tin crisis. Ora cu minister ta bisa pa bin yuda trece solucion, Wyatt-Ras cu anjanan a traha y enfoca riba e tereno aki ta bisa minister pa e bin para band’i Wyatt-Ras y su partido y sigui cu e trabou paso sector social ta un continuum.
Mirando tur loke Wyatt-Ras a yega di haci pa loke ta trata sector social mientras e minister aki ora e tabata den parlamento tabata na sonjo durante 8 anja largo y no tabata ni bin reunion cu actornan social awor e minister mester sinja mas di e sector aki. Wyatt-Ras na 2006 tabata un di iniciador di e ley di iniciativa pa hisa castigo pa abusadornan di mucha, pa hisa boet, pa amplia e grupo di victimanan cu ta ser protehi cu mucha homber, esnan cu un handicap, hende muher y esnan cu ta fuera di comocimento. Tambe como un di iniciadornan a logra pasa e ley di zwangerschapsverlof na 2007. Di e forma aki a duna mamanan mas tempo cu nan yiu despues cu ela nace pa haci posibel cu babynan por bebe lechi materno. Tambe cu e vaderschapsverlof na 2015 a duna tatanan dianan pa ta cu nan yiunan recien naci. Ora a trata e ley di BW na 2016 a boga pa fortifica e rol di e meldpunt den ley. Alavez den un mocion cu a ser aproba dor di mayoria den Parlamento na 2015 a logra pa Sostenemi por haya mas trahador, segun nan peticion. Den 2016 Parlamento a skucha diferente actornan ariba tereno di abuso di mucha y a yama minister pa duna un bista di kico a ser haci. Ora a aproba e rapport di e comision esnan cu ta goberna awendia no tabata presente. Incluyendo e minister.
Wyatt-Ras ta lamenta alavez cu minister Croes ta manda su colega Parlamentario Sue Ann ataca Wyatt-Ras. Diferente cifra den e anjanan a ser uza dor di sra. Ras, entro otro di Censo 2010. Netamente pa combati pobresa den famianan y pa hisa e nivel di bida di esnan vulnerabel den nos comunidad partido AVP den gobernacion a aumenta bijstand, gehandicapten uitkering, a introduci schoolkinderentoeslag, a hisa salario minimo y a introduci reparatietoeslag pa esnan cu tin salario bao di salario minimo. Tur esaki teniendo cuenta cu e cifranan di Censo 2010 y e bestaansminimum cu a ser describi. A base di acuerdo den Reino gobierno di AVP desde 2014 a stimula prevencion y a enfoca ariba nos hobennan pa fortificanan como lidernan den nos comunidad. Den parlamento tanto di Aruba como den Reino a duna señal cu tin cu bai den direccion di prevencion y asina diferente iniciativanan a resulta den practica. Pa fortifica famianan a inverti den Bo bario pa stimula voluntarismo y responsabilidad di un pa otro den comunidad. Hobennan a ser envolvi e.o. pa haci limpi y yuda verf cas den diferente bario pa asina duna barionan un mihor bista/ambiente y pa crea envolvimento di habitantenan. A coloca canchanan deportivo y parkenan den diferente bario. A drecha viviendanan y infrastructura di nos hendenan cu ta biba den casnan di pueblo na p.e. Juana Morto y Jaracomplex. A construi viviendanan special pa nos grandinan na Jaburibari y a construi MFA nan pa nos hendenan no tin cu bai leu di cas pa paga nan utilidadnan y pa nan por topa otro pa intercambia y asina mehora cohesion.
Pa atende cu hobenan den dificultad a drecha e edificio, a mehora e guia y servicio di centro Orthopedagogico y a bin cu proyecto di Sociale Vorming. Ademas pa sostene mayornan cu ta traha a crea Trai Merdia y a inicia cu Trai Merdia pa hobennan. A crea diferente asina yama randvoorwaarden, esta condicionnan pa un bon educacion di nos muchanan, banda di tur inversion den enseñanza.
Wyatt-Ras ta lamenta cu tanto e minister como su colega no ta compronde cu e trabou di un parlamentario ta di pasa leynan y controla si gobierno ta ehecuta su maneho. Un parlamentario no por ta den un comision pa ehecuta plan cu minister tin cu ehecuta. E ora e no lo por ta objetivo pa controla e minister. Mester por confia cu trahadornan den sector social ta profesional y cu parlamentarionan of ministernan no mester di tey pa profesionalnan por traha. Wyatt-Ras den su trajectoria den sector social semper a traha neutral leu di politica. Contrario na loke e minister di Asuntonan Social kier haci awor y kier pa Wyatt-Ras bai yud’e. Si e kier conseho semper e lo por a pasa serca Wyatt-Ras pero ela skohe pa haci manera cu nada no a ser haci promer cu ela bira minister. Wyatt-Ras su deseo ta pa e minister cumpli cu su promesanan. Ehecuta e plan di crisis y presenta e fondo manera cu CaFT tambe a indica. Bo por duna placa pero tin cu pone instancianan hunto. Placa placa placa no ta tur cos ta importante pa e diferente instancianan y organisacionnan por traha hunto. Lo resulta apesar cu minister a inverti tur placa den 2 anja pa e diferente sectornan cu ainda problemanan no ta ser soluciona paso consecuencianan di abuso ta di duracion largo y ta rekeri cooperacion estrecho entre instancianan pa loke ta trata referencia y continuacion di guia di casonan. Pero Wyatt-Ras por garantisa un y tur cu unda cu e ta e lo ta e lo keda sali na vanguardia di e sector social pa duna sosten necesario na esnan vulnerable y den dificultad.