Diabierna mainta Minister Gerlien Croes, como Minister di Educacion, a atende e evento di team building organisa pa Bureau Traimerdia. Durante e team building aki, den colaboracion cu Departamento di Recurso Humano, topico manera inteligencia emocional, union y desaroyo pa cu trabou di cuido y guia pa nos muchanan a lidera.
Traimerdia ta e unico organisacion gubermental cu ta brinda cuido y guia na nos muchanan despues di scol. Asina aki mayornan ta haya e oportunidad pa por particpa den e proceso laboral cu tur trankilidad y sin preocupacion.
E hilo comun cu ta core den e programa di Traimerdia ta e formacion di nos muchanan cu balor y norma. Traimerdia ta ofrece un programa den cual tin espacio pa variacion y posibilidad pa adapta na e nesesidadnan di e muchanan. E programa ta enfoca riba e desaroyo integral di e mucha den areanan social, emocional, fisico y intelectual.
Pa loke ta trata sosten den e parti di enseñansa, e actividadnan ta inclui: huiswerkbegeleiding, stimulacion di siñamento y actividad special pa encurasha lesamento. Ademas, e actividadnan di habilidad manual y dibuho, musica, expresion di movecion, deporte y weganan tin como meta pa lanta interes den e muchanan pa nan por sigui desaroya nan mes den un of mas di e areanan aki.
“Mi ta contento di por a atende e seminario organisa pa Bureau Traimerdia. Ta importante pa e personal di Traimerdia keda educa y eleva nan mes. Nan funcion ta uno esencial door di cuida y guia nos muchanan y asina crea miho serhumano pa sirbi nos comunidad”, Minister Croes a menciona.
Minister Croes ta gradici e team di Traimerdia pa e bon trabou cu nan ta desplega. Alabes, Minister a bisa di lo mantene un laso estrecho cu e organsacion.
