Minister Geoffrey Wever a asisti na ceremonia di entrega di certificado pa e programa Youthpreneur, organisa pa Departamento di Asuntonan Economico (DAECI) a traves di su unidad IDEA. E serie di tayernan a tuma luga durante e temporada di vakantie, cu tabata destina pa hobennan entre e edad di 12 pa 17 aña, cu e meta pa duna nan e hermentnan necesario pa desaroya nan “skills” empresarial. Entre otro, e hobennan a siña con por traha un plan di negoshi, con por pensa riba esnan cu por yuda nan pa financia e negoshi, y mas importante ainda, con bo por identifica ken ta bo mercado y con bo ta por mercadea bo producto of servicio.
Educacion empresarial ta fundamental pa yuda prepara e generacion pa futuro. “Nunca ta demasiado trempan pa instala e conocemento aki”, segun Minister Geoffrey Wever. E mandatario a entrega e certificadonan, haciendo mencion cu “e speransa ta cu esaki lo ta e prome di hopi diploma mas, sea di scol of di cursonan, cu lo sigui yuda e hobennan pa nan sigui desaroya y posibelmente bira empresarionan exitoso den futuro.”
Minister Wever a expresa su aprecio na Sra. Judella Trim, Sra. Louella Croes, y na directora di DAECI, Sra. Maria Dijkhoff-Pita, pa nan compromiso continuo cu e programa. E minister a desea tur e hobennan hopi exito den nan futuro empresarial.
