Awe Diamars, 23 di Februari minister Geoffrey Wever lo biaha hunto cu un delegacion comercial di Aruba pa Bogotá, Colombia. E delegacion ta consisti di empresarionan, representantenan di Kamer van Koophandel Aruba, como tambe di Departamento di Asuntonan Economico, Comercio y Industria y lidera pa minister Geoffrey Wever. Un mision comercial ta un instrumento importante den maneho economico di un pais. Meta di esaki ta pa banda di fortifica e cooperacion economico entre e dos paisnan, tambe facilita cu nos negoshinan tin mas acceso na e mercado Colombiano y stimula cu nos consumidornan tin mas choice den productonan y servicio.
Minister Geoffrey Wever a informa cu representantenan di sector comercial di Aruba ta bay participa den actividadnan importante pa promove nan negoshi y fortifica relacionnan comercial cu Colombia, enfocando riba oportunidadnan nobo pa miho productonan y/of miho prijs, of expande nan servicio internacionalmente.
Colombia ta un ehempel primordial di un mercado potencial caminda empresarionan di Aruba por expande nan operacionnan. Durante nan estadia na Colombia, e delegacion ta plania pa participa den negociacionnan intensivo, establece conexionnan strategico cu potencial clientenan como tambe identifica oportunidadnan di colaboracion. "E mision comercial ta un paso esencial pa e empresarionan di Aruba den nan esfuersonan y ambicion pa amplia nan mercado y expande nan servicio den e region". Tambe ta reconoce e balor geopolitico di e Trade Mission pa fortifica relacionnan bilateral y e lasonan comercial entre Aruba y Colombia, cual ta "contribui na intensificacion di comprension intercultural, respet mutuo y cooperacion", segun minister Geoffrey Wever.
Tambe tin representante di ministerio di salubridad cu lo acompaña e delegacion, explorando oportunidadnan pa yega na um acuerdo bilateral y asina reanuda importacion di carni for di Colombia. Esaki sigur lo ta un paso monumental si por logra esaki, importa carni di Colombia, mirando su cercania y prijs faborabel.
“Un palabra di exito na ful e delegacion, specialmente nos empresarionan y cu hunto nos logra acuerdonan cu beneficio mutuo pa e dos nos paisnan”. Tabata palabra di Minister Geoffrey Wever.
