Dos siman pasa Minister Geoffrey Wever a cuminsa cu su proyecto di presentacion di e metanan di desaroyo sostenibel, e ‘Sustainable Development Goals (SDGs)’, na alumnonan di 6e klas di scolnan basico. E presentacion ta enfoca riba conscientisacion di kico e metanan di desaroyo sostenibel ta encera y con cada un di nos por yuda na logra e metanan.
Awe Minister Geoffrey Wever a bishita Xander Bogaerts basisschool na San Nicolas pa duna presentacion di Sustainable Development Goals na e 6de klasnan.
Kico ta desaroyo sostenibel? Desaroyo sostenibel a ser defini como desaroyo cu ta cubri e necesidadnan di e presente sin compromete e abilidad di futuro generacionnan pa por cubri nan propio necesidadnan. Pa logra esaki mester tin harmonia entre e aspecto humano, balansa den desaroyo economico y prosperidad, y tambe proteccion pa nos medio ambiente.
E SDGs ta consisti di 17 meta pa paisnan na mundo traha na dje pa un miho mundo. E ta wordo parti den 5 pilar: People, Prosperity, Planet, Peace y Partnership.
“Un danki na Xander Bogaerts basisschool pa a ricibi nos” – Minister Geoffrey Wever.