Diaranson merdia, Minister Endy Croes a bishita Aeropuerto Internacional Reina Beatrix pa saluda y desea exito na e 80 alumnonan di H4 y HL2 y e diesdos (12) guianan di Colegio Nigel Matthew cu a sali di biahe pa Canada. E alumnonan a biaha di 3 pa 10 di april, unda cu nan lo bishita diferente “college” y universidad cu Minister Endy Croes a firma un acuerdo, entre otro, Sheridan College, Bishop University, Niagara College, Seneca College y Ontario Tech University. E meta di e biahe educativo aki ta pa e studiantenan tin un miho bista di kico e scolnan avansa na Canada ta ofrece y cual estudio ta ricibi financiamento di Arubalening. Ademas di esaki, e studiantenan por experencia un otro cultura y clima. E comision organisado di e biahe educativo aki ta consisti di: hefe di delegacion, Sr. Ricky Arends, Sra. Laura de Cuba, kende ta encarga cu e administracion y Sr. Cedrick Kelly cu ta maneha e parti operacional. Pa conclui, Minister Endy Croes ta desea e studiantenan hopi exito cu e biaha educativo na Canada.
