Durante siman Mandatario di Enseñansa a reuni cu Rector di Universidad di Aruba, Dr. Viola Heutger hunto cu Presidente di Hunta di Supervision sr. Herry Koolman riba diferente tema. Inicialmente a repasa proyectonan di interes cu a wordo trata durante ‘4 Landenoverleg’ cu a tuma luga den luna di maart ultimo na Hulanda. A toca e tema di ‘regiegroep’ pa cu e proyecto ‘studiesucces’, e proyecto aki lo wordo organisa na Aruba den luna di september/october di e aña aki. Pa cu esaki Universidad di Aruba ta hunga un rol grandi, lo organisa y carga e proyecto aki cual lo tuma luga na Aruba.
Alabes a splica cu Universidad di Aruba a bishita Xavier University recien y a keda hopi impreciona cu e facilidad y calidad di enseñansa cu nan ta brinda. Xavier University tambe tin un programa actual di ‘verpleegkundige’ cu lo fit hopi bon pa yuda e problematica di Hospital. Banda di esaki e reunion a bay basta profundo riba futuro di e universidad y colaboracion entre Universidad di Aruba y Curaçao. Minister di Enseñansa a scucha tur e ideanan nobo cu hopi atencion y a priminti Universidad di Aruba cu semper e lo ta cla pa yuda te unda cu e por pa hunto brinda lo maximo oportunidad na nos studiantenan pa cu nan estudio y futuro.
