Diahuebs ultimo, Su Excellencia, Sr. Chris Romero, Minister encarga cu e Sector Primario di Aruba, a hasi un bishita di cortesia na Departamento di Agricultura, Cria y Pesca conoci como Santa Rosa. Minister Romero a bin cu un grupo di delegadonan di su Ministerio cu e propostito pa por combersa cu e Generencia di e Departamento y asina conoce un poco mas di e nan maneho y desaroyo di diferente projectonan.
Sra. Nathalie Maduro, Directora pa Santa Rosa conhuntamente cu e team di maneho pa e Departamento a hiba un combersacion bastante extenso, elaborando ariba tur e diferente proyectonan cu e Departamento a ehecuta y otronan cu ainda mester finaliza. Sra. Maduro a splica tambe encuanto di e diferente puntonan di atencion, caminda cu tanto e Productornan como tambe Santa Rosa mes, lo mester di support y cambionan di ley pa por sigi desaroya Aruba su Sector Primario ariba otro nivel, cu e proposito principal di logra menos importacion cu producionan di cuminda den un forma mas sostenibel y consante.
Un punto sigur importante y cu semper ta keda uno crucial ta e problematica di awa pa nos productor nan local. Aki e splica Minister Romero encuanto di e strategia y nececidad tras di e implemetacion e proyecto UV Filter na Parkietenbos cu sigur lo ta di gran balor pa e Sector Agrario di Aruba. Tambe a toca e tema di Huurgronden y posibilidadnan di diferente estudionan specialisa pa por tin datosnan concreto di kiko ta systemanan cu lo por traha cu Aruba su situacion climatico y e concientizacion ariba e tipo di proceso nan asina. Logicamente Su Excellencia, Minister Romero tambe tin su plannan pa bai wordo concretisa y algo cu a resalta durante e reunion ta cu tanto e Mandatario como e Gerencia di Santa Rosa tin e mesun vision y deseonan pa por desaroya e Sector y ta reconoce cu ainda tin hopi limitacionan cu mester traha ariba nan. E parti positivo ta cu Minister Romero tin tur atencion pa e Departamento y sigur pa e Producto y Piscadorrnan local y lo ta repasando tur e diferente plannan di projectonan den pipleline y esnan nobo, pa asina hunto cu e Gerencia traha un plan di ehecucion structura pa inicia cu e diferente projectonan y cambionan den maneho di inmediato.
E reunion a bay den un forma sumamente ameno y abierto. E proximo bishita di Minister Romero ta programa pa pa final di otro siman, caminda cu e Mandatario lo bolbe Santa Rosa pa hasi un recorido ariba henter e tereno y asina por bishita cada Seccion y pa e por haya un oportunidad pa combersa tambe cu e coleganan. Tambe lo hasi un bishita na Santa Rosa su Seccion di Pesca na Centro di Pesca Hadicurari pa combersa cu e team y discuti posibilidadnan con e Ministerio, Santa Rosa y Fundacion Centro di Pesca Hadicurari por traha den un forma ainda mas estrecho.