“Despues di lunanan di reunion, anticipacion, deliberacion y di participacion di e sector di cuido, nos ta cla pa anuncia lansamento di Inspectie Volksgezondheid Aruba entrante dia 1 di januari 2017”, asina mr. Dorylee Lopez-Penha, Inspector General di e departamento nobo, Inspeccion di Salud Publico Aruba, a duna di conoce na ocasion di su presentacion oficial den sala di conferencia di Bestuurskantoor. Minister dr. Alex Schwengle a presenta e departamento nobo y e prome Inspector General di Salud Publico di Aruba den presencia di e figuranan di mas importante den e industria di cuido y salud.
Entrante dia 1 di Januari 2017 lo sosode dos cos simultaneamente, e departamento ta mira luz di dia y e ley relaciona cu inspeccion pa garantisa calidad den cuido ta drenta na vigor, manera aproba unanimamente den Parlamento na December 2014.
Inspectie Volksgezondheid Aruba ta resorta directamente bou e Minister di Salud Publico, pero ta traha pa pueblo, sirbiendo e mundo medico den nos communidad. E departamento ta posiciona su mes saliendo for di un punto di bista independiente y confiabel. Inspectie Volksgezondheid Aruba tey pa garantisa cuido di calidad, di acuerdo cu normanan defini den ley.
Nan mision ta pa controla y asina sigura un minimo nivel di calidad y pa stimula mehoracion continuo den nos cuido. Nan vision ta pa tin un cuido medico responsabel cu e ciudadanonan di Aruba por confia riba dje. E balornan fundamental di Inspectie Volksgezondheid Aruba ta su independencia, pro actividad, transparencia y profesionalismo.
For di prome di Januari 2017 lo tin un instituto na disposicion di comunidad y un caminda unda lo por acudi na momento cu sinti cu e cuido brinda na nan, ta bou di e nivel spera. E rol di Inspectie Volksgezondheid Aruba e ora ta pa informa, intermedia y busca claridad pa e pashent. E instituto nobo lo ta un partner di tur e dunadonan di servicio y cu nan lo ta e brug entre pashentnan y e dunadonan di servicio, fungiendo conforme ley.
“Nos ta den dialogo ainda, pasobra nos kier ta sigur cu asina nos cuminsa dia 1 di januari 2017, cu tur dunado di servicio ta consciente di nos rol y tambe di e exigencia stipula den e leynan nobo y cu hunto nos lo sa di hisa e nivel di cuido mas ainda”, asina Mr. Dorylee Lopez-Penha a duna di conoce na e invitadonan pa presentacion di e departamento nobo. “Nos tur ta boga pa tin mas confiansa den nos cuido medico na Aruba y cu introduccion di Inspectie Volksgezondheid Aruba mi ta sigur cu hunto nos lo logra”.
Mr. Dorylee Lopez-Penha ta un hurista cu a specialisa riba legislacion, pues trahamento di ley. El a logra su diploma na Academie voor de Wetgeving na Den Haag, Hulanda y tabata e “Senior Beleidsmedewerkster” na Ministerio di Salud Publico, Cuido di nos Grandinan y Deporte. E tarea di Inspectie Volksgezondheid Aruba ta pa supervisa Hospital, IMSan, Casnan di cuido, dokternan di cas, specialistanan, partera, dentista, fisioterapistanan, tur dunado di cuido cu ta registra bou di e hurisdiccion BIG di Hulanda of e AruBIG cu lo drenta na vigor pronto.