Tur aña riba dia 21 di September organisacionnan di Alzheimer rond mundo ta observa e dia aki pa concentra esfuersonan den conscientisacion riba e enfermedad di demencia. Alzheimer ta e forma mas comun di enfermedad demencia, un grupo di retonan cu tin como consecuencia mal funcionamento di e mente.
Cada 68 seconde, un hende na mundo ta desaroya e enfermedad di Alzheimer. Si sigui asina, expertonan ta anticipa cu na Merca so e cantidad di pashentnan di Alzheimer lo a crece 4 biaha y yega 16 miyon na aña 2050.
Ta bon pa enfatisa cu hopi biaha ta considera Alzheimer como un enfermedad di famia, pasobra e stress cronico pa mira un ser keri di bo perde su mente poco poco ta afecta henter e famia. Awendia na Merca so tin 5.4 miyon pashent cu Alzheimer y e enfermedad ta na number 6 riba e lista di causanan di morto for di enfermedadnan incurabel. Mirando cu awendia hende ta biba mas y e generacion di “baby boomers” ta creciendo den edad, sosten na tur sorto di investigacion rond di e enfermedad aki ta necesario.
Na Aruba e cantidad di ciudadanonan bibando mas di 50 aña di edad ta subiendo drasticamente y na aña 2010 tabatin 12.5% mas habitante di e edad ey compara cu 10 aña prome. Cu esey ta nota cu nos hendenan ta bibando mas, pero kier keda activo y independiente.
Edad ta un factor di riesgo pa haya demencia/Alzheimer. E risico ta mas grandi pa hendenan riba 65 aña, pero na Aruba tin caso di hende mas hoben cu ta hay’e. Otro factornan di riesgo, cu ta conduci pa un hende haya demencia mas lihe, ta peso di mas y falta di actividad fisico.
Demencia ta limita e persona pa por sigui un bida su so na cas y independiente, en bes di den un cas di cuido. E reto tambe ta cu no tin cura pa demencia, locual ta afecta henter e bida na cas cu e famia y sernan keri di e pashentnan.
Alzheimer ta afecta personalidad di e persona. E persona afecta cu Alzheimer su identidad no t’ey mas. Na aña 2010 tabatin 600 persona registra cu demencia na Aruba. Segun calculacionnan na aña 2030 e cantidad di caso lo bira mas cu dobel, esta riba 1200. Alzheimer tambe ta forma parti di demencia. Demencia ta afecta memoria, e forma di pensa, comportacion y emocion di un persona. E ta e causa mas grandi di demencia.
Pa tarda e proceso di desaroyo di e enfermedad aki cu no tin cura, ta consehabel pa e persona hiba un bida saludabel, cual ta encera come saludabel y haci actividad fisico tur dia. Alzheimer ta un enfermedad cu no ta discrimina, pues e por afecta cualkier persona, tanto hende muhe como tambe hende homber.
Na Aruba e consciencia pa cu Alzheimer ta creciendo y tin mas atencion awendia pa su diagnostico y tratamento mas tempran. Nos isla conoce un cadena di cuido pa trata demencia. Na Centro di Memoria ubica den SABA-Oranjestad ta tuma luga e diagnostico, tin 2 dokter specialisa pa trata hende grandi (e.o. geriatra, “ouderengeneeskundige”) y e psicologo di Cas Marie y SABA. Cas Marie ta brinda sosten na y ta haci actividad cu e pashent cu tin Alzheimer y nan ta duna apoyo na e famia.
Minister Dr. Alex Schwengle ta haci un apelacion na comunidad pa hunto nos sostene pashentnan cu ta sufri di Alzheimer y nan famia, cu tambe hopi biaha ta sufri hunto cu nan.