“Mi ta di opinion cu AZV a haci un bon trabou den duna informacion tocante e caso ora cu esaki ta necesario”, asina Minister di Salud Publico, Maneho di nos Grandinan y Deporte, dr. Alex Schwengle, a duna di conoce siman pasa durante un conferencia di prensa pa contesta preguntanan tocante di e status di e caso di Baby Lunah, kende ta actualmente na Merca.
Minister Schwengle a cuminsa na bisa cu tur persona tin deseo, tur sorto di deseo, pero na dado momento tin cierto pakete di seguro cu comunidad por “afford” y no ta tur cos por inclui den e pakete aki, ni con amplio nan haci’e. E pakete di AZV ta basa riba cierto “richtlijnen” y e fundeshi pa cumpra cuido ta cu e cuido mester ta proba di ta sigur y efectivo (“veilig en effectief”). El a splica cu practicamente e unico forma cu por inclui tur tratamento den e pakete di AZV ta si e cobertura di AZV costa 50% di e GDP, pues di cada florin cu un hende cobra 50 cen ta bay pa AZV.
Mirando e limitacionnan di finansas di pueblo, por conclui cu e pakete ta bastante amplio y AZV tin obligacion y e ta para den ley tambe cu AZV por cumpra solamente cuido di cual ta proba cu e ta sigur y efectivo. AZV ta basa decisionnan riba loke expertonan ta determina como e “richtlijnen” cu ta indica cu e cuido ta sigur y efectivo. Esaki ta nifica cu pa cierto enfermedadnan e expertonan ta bisa kico ta e miho manera pa haci’e. Semper tin opcionnan cu no ta proba ainda, esaki nan ta wordo referi na como experimentonan of tratamento alternativo.
E problema di cuido of tratamento alternativo of experimental ta cu AZV no ta cumpra e cuido cu ta cay den e categoria aki, como cu nan no ta comproba sigur y efectivo na termino cortico of termino largo. E motibo p’esaki ta cu AZV no por core e risico cu e ta cumpra un cuido cu ta bay haci mas daño na e pashent cu e ta haci’e bon, of cu ta resulta cu ta tirando placa afo. AZV no ta bay haci un cos di cual no sa di antemano si e no tin un balor añadi pa e pashent su bida y/of e calidad di bida di e pashent.
Minister Dr. Alex Schwengle a bisa cu eynan e limitacion di AZV ta sinta, sinembargo e sistema no ta asina arogante tampoco. El a subraya cu e sistema ta tene cuenta cu desaroyonan den ciencia y cu ciencia ta algo cu ta continuamente den desaroyo. Den e caso di Baby Lunah, e experticio na Aruba ta limita y a busca opinion den exterior cerca expertonan na Hulanda y na Colombia riba e condicion cu Baby Lunah tin y su status specifico. A comparti cu e expertonan na Hulanda tocante di e procedura cu kier haci cu Lunah na Merca y nan a bisa “niet doen”, e expertonan di Colombia tambe a bisa pa “no haci’e”.
AZV a papia tambe cu e ciruhano cu ta bay haci e intervencion y a puntr’e si ta algo cu ta reconoci den su grupo di experto na Merca y a sali afo cu e intervencion aki no ta cay den e “standard of care”. E por resulta bon, pero tambe por resulta hopi malo.
Minister Schwengle a bisa cu “standard of care” ta “standard of care”, pero hecho ta cu tin areanan “grijs” den medicina y cada pashent ta diferente. Cada pashent ta unico; y sa haci excepcion, pero pa haci e excepcionnan aki expertonan na Hulanda of Colombia mester mira Lunah y evalua su caso, Minister Schwengle a finalisa bisando.