E tecnicanan a cambia y a bin mas trabao acerca, pero e obhetivo di departamento di higiena di Directie Volksgezondheid no a cambia. Den su 80 añanan di existencia, e meta basico, esta pa tin bon maneho di higiena na Aruba riba diferente topico, a keda e enfoke y mision.
Esaki Minister di Salud dr. Alex Schwengle a expresa na ocasion di e celebracion di e di 80 aniversario di e organisacion cu a wordo funda na 1936 pa un grupo di dokter cu a bin di Corsou. E grupo a trece un persona specialisa Aruba pa keda traha aki como controlleur.
E departamento ta haciendo un tremendo trabao, Minister Schwengle a bisa, mencionando algun di e diferente topiconan riba tereno di higiena cu nan ta percura pa vigila, cual ta inclui siguridad di cuminda (food safety), higiena di awa, y higiena sanitario (di bañonan publico). Entre otro aspectonan cu tambe ta resorta bao di nan responsabilidad ta e higiena di graf y kelder.
Minister Schwengle a remarca cu den e ultimo añanan e team ta mas activo p’afo, controlando e “veld”. Un tarea cu ta sigui capta hopi atencion ta e control di restaurantnan, unda cu nan ta trata di ta un yudansa pa e negoshinan.
Un di nan tareanan mas conoci ta esun di control di luganan cu ta bende cuminda, y ta conoci cu nan ta cera e negoshinan pa un cierto cantidad di ora si nan no ta cumpli cu e reglanan pa duna nan un chens pa mehora, y esunnan cu no ta mehora ta core e risico di perde nan permiso. E salud di e comunidad ta bin nan prome luga.