Recientemente tabata na Aruba e representante di Pan American Health Association/World Health Association (PAHO/WHO) pa Venezuela y Caribe Hulandes, esta dr. Jose Moya. PAHO/WHO ta reuni un biaha den dos aña cu e representantenan di e islanan specificamente pa papia tocante di colaboracion cu PAHO y e cooperacion entre e islanan.
Minister di Salud Publico y Deporte ta traha den forma estrecho cu PAHO riba diferente proyecto separa y pa desaroya programanan di prevencion den salud riba nos isla. Claro cu den e proceso ta purba pa, mas cu ta posibel, pa realisa e programanan aki den forma colectivo hunto cu nos rumannan den Caribe Hulandes.
Durante di e reunion cu PAHO recientemente a fiha e caracter di yudansa cu e islanan mester di PAHO y con e islanan ta traha hunto pa mantene un estado di salud den e comunidadnan manera debe ser y a cubri puntonan di agenda pa e periodo 2018-2019. A conta e biaha aki cu presencia di representantenan di Corsou, Boneiro, Sint Maarten y Saba.
Retonan den e area di salud, manera enfermedadnan infeccioso, enfermedadnan cronico, maneho di salud, programanan y normanan, ta en realidad e tema principal di e encuentro, cu e meta di mantencion di salud riba un bon nivel.
Minister di Salud Publico y Deporte a agrega cu a elabora entre otro encuanto di cooperacion tecnico, kico cada isla mester y con PAHO/WHO por yuda cada un. Un otro parti importante di e colaboracion cu PAHO cu tambe a discuti ta e mantencion di vigilancia y e cooperacion entre e paisnan.