Recientemente Plataforma pa Cuido di Nos Grandinan a ricibi e nota di maneho pa cu cuido di hende grandi na Aruba for di Minister di Salud dr. Alex Schwengle. E maneho a wordo skirbi pa Gobierno y Departamento di Salud Publico. E plataforma a wordo forma na aña 2015 y a inclui e stakeholdernan mas grandi riba tereno di cuido di nos grandinan.
E plataforma ta encabesa pa dr. Sandro Waterloo, internista geriater, pa Dr. Horacio E. Oduber Hospitaal, y tin como miembronan representantenan di Wit Gele Kruis, Asuntonan Social, Stichting Algemeen Bejaardenzorg Aruba (SABA) y casnan di cuido priva. Anteriormente, Minister Schwengle a establece tambe un unidad nobo na Departamento di Salud Publico (DESPA) cu ta encarga specificamente cu tur cos cu tin di haci cu cuido di hende grandi. E plataforma ta funciona manera un dialogo social, pero mas structura. Nan ta “toets” cierto pensamento y ta forma ideanan independiente for di Gobierno; e miembronan ta discuti cambionan, consehonan, etc.
E mandatario a laga sa cu Gobierno y DESPA ta spera feedback for di e plataforma riba e contenido di e documento cu ta basa riba e vision y mision di Gobierno. Despues e documento lo wordo comparti tambe cu otro partnernan, incluyendo AZV. Minister Schwengle no kier a elabora ainda riba e contenido di e maneho, pero a subraya cu tin hopi cambio positivo na caminda, cual ta inclui un maneho financiero diferente; lo tin cambio pa cu control y guia di calidad tambe, particularmente pa e cuido intramural, esta den e casnan di cuido. El a agrega cu lo yuda y facilita procesonan pa organisacionnan manera SABA. Ademas ta premira miho cooperacion ainda entre e partnernan.
E plataforma ta analisa e “veld” continuamente pa mira kico ta importante y kico e necesidadnan ta. Nan ta comunica cu Gobierno y DESPA y ta e “klankbord” pa comunidad y e “veld”. Nan ta un bon partner pa Gobierno, segun Minister Schwengle. Nan ta bayendo bon den nan trabao y ta trahando di un forma hopi positivo y obhetivo.
E titular di salud publico a urgi pa e miembronan sigui mantene e plataforma activo y participa na e proceso di mehoracion di calidad den cuido pa nos grandinan y mantene un bon standard di calidad. El a gradici dr. Waterloo y tur otro miembro di e plataforma, cu ta traha boluntariamente pa e plataforma.
Dr. Waterloo a subraya cu e rol di e plataforma ta na final di dia pa hisa e calidad di cuido cu ta wordo duna na hende grandi. Un di e formanan pa garantisa e calidad, ta pa bin cu exigencianan pa e “veld”, cual ta loke gobierno a haci tambe den forma di e documento cu a wordo entrega. E ta di opinion cu e prome cos cu mester pasa ta pa check cerca e hendenan grandi cua di nan ta vulnerabel pa asina yuda nan preveni cu, por ehempel, nan ta cay. perde peso lihe of perde funcion. Asina ta evita cu nan ta drenta hospital of mester bay biba den un cas di cuido.