Minister di Salud Publico, Cuido di Nos Grandinan y Deporte, dr. Alex Schwengle tabata hopi contento di mira hopi mayor, como tambe fanaticonan presente pa apoya e muchanan cu a participa na e bunita celebracion di apertura di e campeonato di LIFIDA. E mandatario a gradici LIFIDA y Buchi Panama y su team chikito cu semper a haci un tremendo trabao y ta esunnan responsabel pa LIFIDA a crece bira grandi manera e ta awendia.
A yega e momento pa reenforsa e cooperacion entre LIFIDA y AVB, Arubaanse Voetbalbond, segun e Minister a splica y AVB ta haciendo miho trabao, cual ta haci posibel pa tin miho cooperacion tambe. Minister Schwengle ta di opinion cu AVB ta haciendo miho trabao y ta gradici nan pa e proceso di organisacion y reorganisacion cu nan ta pasando aden riba nivel di structura, maneho y finansa. Nan ta haciendo un bon trabao cu e sosten di KNVB, CONCACAF y Ministerio di deporte.
Tabata pa Minister Schwengle un placer pa mira tanto mayor, fanaticonan, y clubnan celebrando cu e muchanan e apertura di nan campeonato. El a agrega cu ta manera e representante di Lotto a bisa, cu mester bira mas responsabel, mester siña con pa maneha miho e recursonan cu tin, tanto pa loke ta e boluntarionan, pero tambe e recursonan riba e nivel administrativo y e parti financiero.
Minister Schwengle a conclui bisando cu tin algun tempo caba ta papiando cu Lotto pa aumenta e entrada pa futbol, pero aunke nan por a garantisa nada ainda, el a pidi pa entre un y dos miyon extra y e ta spera cu logra esaki den e proximo un pa dos añanan. Si por crea dos miyon mas pa deporte, cu bon maneho, lo mira sigur miho fruto pa nos pais, e Minister a comenta.