E casnan di cuido priva na Aruba ta hunga un rol importante den e cuadro completo di cuido di nos grandinan. Nan ta esunnan cu ta provee “wijkzorg” na Aruba; “intramurale zorg” ta wordo provee pa SABA (Stichting Algemene Bejaardenzorg Aruba); y “thuis zorg” ta den man di Wit Gele Kruis. Esaki Minister di Salud, Deporte y Cuido di Nos Grandinan, dr. Alex Schwengle a laga sa na ocasion di e entrega di e documento di maneho pa tur instancia y institucion cu ta provee cuido pa hende grandi na nos isla.
E casnan di cuido priva tin representacion den e Plataforma di Cuido di Nos Grandinan, y e mandatario a subraya cu nan rol den e cadena di cuido ta uno importante. Stella Rasmijn di Stichting Cas Cristella a ricibi e documento den nomber di tur e casnan di cuido priva. No tur cas di cuido tabata representa durante di e encuentro cu a tuma luga den e sala di reunion di Departamento di Salud Publico, y Minister Schwengle a laga sa cu nan lo ricibi un bishita di dje y miembronan di e “ouderenafdeling” den e proximo simannan; e lo entrega e documento personalmente.
Minister Schwengle a splica cu el a pidi e casnan priva pa uni y traha hunto, y nan ta forma parti di e plataforma tambe. Awo cu e maneho ta cla y e landsverordening zorginstellingen a keda activa na luna di augustus, e trabao di haci un “nulmeting” por cuminsa. E casnan lo ricibi un lista di puntonan di interes, y lo tin un periodo di aproximadamente dos aña pa cumpli cu e normanan stipula. Pa e proceso di adaptacion y mehoracion nan lo ricibi asistencia, y pues nan no lo ta para nan so.
Minister dr. Alex Schwengle a subraya cu e intencion no ta pa cera ningun negoshi, y – al contrario – e ta haya personalmente cu nan iniciativanan ta di elogia. E trabao cu nan ta haci ta uno pisa y duro, pero hopi bunita. Nan ta atende cu hende grandi cu tin malesa, cu mester di yudansa fisico, etc. y ta di elogia cu nan t’ey. E calidad mester wordo eleva, y “nos t’ey pa yuda,” e mandatario a laga sa.
E “nulmeting” cu ta wordo tuma, ta encera un checklist basta amplio cu ta inclui “con e cuido ta”, “e cuido di remedi”, e siguridad, e infrastructura, etc. Uzando e nulmeting lo formula un trayecto di mehoracion pa un periodo di dos aña.
E minister a bisa cu el a haya e remarca cu e chens ta cu cuido ta bay bira mas caro, pero e ta di opinion cu si ta asina cu e ta bira mas caro lo busca solucionnan, pero e calidad di cuido mester keda garantisa. Di parti di gobierno lo tin atencion tambe pa e parti financiero.
Entretanto su ministerio ta concentrando tambe riba un proyecto pa garantisa maneho financiero di e casnan di cuido di SABA, esta Paviljoen na Oranjestad, Maris Stella na Savaneta y SABA na San Nicolas. A cuminsa cu e proceso pa pone e maneho financiero den man di AZV.
E intencion ta pa pone ouderenzorg bao di AZV ta importante, e no ta facil, pero lo tin cambionan pa adapta na nan; e meta primordial cu e decision aki ta pa garantisa calidad di cuido pa nos grandinan.
Minister dr. Alex Schwengle a bisa enfaticamente cu “nos como yiu” tin e obligacion social, y ley tambe ta prescribi esaki, pa cuida nos grandinan. Como adulto mester cuida e muchanan, y como yiu mester cuida nos grandinan. El a haci un apelacion na comunidad pa cualkier forsa cu nan tin, como e deber di un comunidad, pa tur hende coopera y yuda cuida nos grandinan. Gobierno tin su obligacion tambe, y ta den un reorganisacion grandi, y ta pidi comunidad tambe haci un esfuerso pa yuda cuida nan hendenan grandi.
