Siman pasa Minister di Husticia mr. drs. Arthur Dowers tabatin un encuentro cu varios sindicato. Presente tabata representantenan di SPA, SADA y FTA kendenan a intercambia di pensamento y a haci sugerencia riba puntonan cu a wordo acorda riba e tema di Orden Publico y Siguridad den Dialogo Social.
E encuentro a wordo parti den dos den cual FTA tabata presente den e prome reunion y den e ultimo, unda cu a trata temanan sensitivo di husticia, tabata presente solamente SPA y SADA.
Minister Dowers den un declaracion duna e siman aki cu den e encuenronan a pidi varios material di trabou, pero cualnan tabata den proceso caba pa wordo adkiri. Pero tambe e sindicatonan a papia di e necesidad di un helicopter, pa yuda den combatimento di criminalidad. Esaki, e Minister a splica, ta algo cu tin su atencion y a bisa cu na momentonan cu tin e recursonan lo pone esaki riba presupuesto di Polis pa tene un destaho publico, cual den pasado nunca a tuma luga ora cu a lease esaki den pasado.
Na mesun momento e mandatario a menciona cu e siman aki a tuma luga e reunion cu tur e stakeholdernan den combatimento di criminalidad y siguridad, inclusive Directie Scheepvaart, pa amplia e cooperacion existente, cerando e frontera mas ainda pa yegada di botonan. E mandatario no por a evita di papia di hilaridad y di ta sorprendi pa un comentario di ex Minister Booshi Wever, kende recientemente mes a wordo atrapa ta actua en pugna cu ley. Tin hopi boto chikito of yatenan cu ta haci hopi cos ilegal, “omkoperij” di funcionarionan na Venezuela. Autoridadnan tin of ta compilando informacion riba e navenan aki ta facilita salida di ciudadanonan for di Venezuela y nan entrada ilegal na Aruba. A constata cu e navenan ta aha hopi facil entre Aruba y Venezuela, y tin informacion cu ta importa hopi cos ilicito pero tambe t haci transporte ilegal di pasaheronan cu supuestamente tin ticket pa biaha bek cu avion, pero unabes cu nan yega tera, no ta bolbe nan pais. Esaki ta un di e puntonan cu ta bay traha riba dje pa evita ilegalidad.