Esaki ta e disgusto mas grandi den transporte en general. Taxinan ta masha rabia di henter e asunto di taxi pirata cu ta aumentando dia pa dia, mescos cu vlam. Y nan ta sinti cu Departamento di Transporte Publico ta man mara, mirando cu e asistencia cu nan ta suppose di haya for di Cuerpo Policial, ta uno hopi pober. Sea cu no tin mucho polis riba caya of nan simplemente no kier bin.
Pa e motibo aki, e taxistanan cu si ta legal, a dicidi di manda un carta pa minister Arthur Dowers, y pidi’e encarecidamente pa un reunion, pa asina papia riba e fenomeno di taxinan pirata, cu a bay for di man. Esaki sigur tabata tin su consecuencianan desbentahoso pa e taxistanan cu si ta mantene nan mes religiosamente na regla.
Den e carta dirigi na Dowers, e taxistanan ta mustra cu nan ta anticipa cu esaki no lo bay suavisa, sino e ta bay bira pio y si no gara e toro na su cacho, e lo bin cu tur e consecuencianan cu por tin pa nan.
Por ultimo e taxistanan a expresa cu nan kier papia cu e minister en persona pa asina mustre diferente punto cu nan kier bin cun’e.
Awo ta keda na e minister pa sinta cu e taxistanan aki, pa asina mira kico por wordo haci, pasobra, manera e carta mes ta indica, nan no por mas. Mester tuma e problema aki hopi na serio y combati e fenomeno aki pa e termina di un manera of otro.