Diaranzon merdia, minister encarga cu husticia na Aruba, mr. drs. Arthur Dowers, a realiza un bishita di trabou na Kustwacht, situa na e base di marina militar Parera na Corsou. Durante e bishita aki, minister Dowers a dialoga cu e director nobo di Kustwacht, Commandant der Zeemacht di Caribe, Peter Jan de Vin, como tambe cu e director suplente Eugene Middelhof. E dialogo entre nan tawata basa riba varios topico di interes general comun, manera entre otro e radar extra y nobo cu ta den proceso pa wordo adkeri y instala na Aruba. Aki nos ta papia di un inversion di mas o menos 2 miyon florin, pa di e forma aki Kustwacht di Aruba hunto cu Cuerpo Policial, sigui brinda seguridad na nos fronteranan. Tambe Minister Dowers a splica e director nobo cu Aruba a institui un departamento di recherche nobo cu ta encarga cu mensenhandel/ mensensmokkel cual ta cai directamente bou di e departamento di recherche encarga cu crimen organisa y cual lo yuda tambe na momento cu e botonan mester purba di drenta cu hendenan indocumenta na nos isla. Pa loke ta trata e colaboracion estrecho cu Kustwacht Aruba y Cuerpo Policial tin cu otro, e mandatario a splica e director J. de Vin, cu e lo desea pa e lasonan entre Kustwacht y Maritiem Politie di Aruba, por ta aun mas estrecho di loke cu e ta caba, door di brinda dicho miembronan policial tambe e oportunidad di traha cu nan pa loke ta trata e radar cu Kustwacht tin na Aruba. Banda di esaki, tambe nan a intercambia di informacion mas estrecho di ayudo cu mester y ta wordo brinda na hermana isla St. Maarten y tambe otro islanan den e besindario cu a sufri enormemente despues di e desaster natural. Por ultimo a wordo indica, cu ta masha contento cu e base solido cu a wordo crea e ultimo 8 aña cu a transcuri, cual ta dunando su frutonan positivo y cu e mesun plan di maneho aki lo continua mirando cu e ta basa riba un termino di duracion duradero y a largo plaso, caminda cu Kustwacht y Polis maritimo di Aruba lo continua ricibi mas material pa continua combati criminalidad na nos fronteranan manera a wordo acorda durante e periodo di 8 anjanan. Un di e ultimo detaye cu minister Dowers a splica ambos dirigentenan di Kustwacht di Caribe, ta su persona a laga institui un asina yama Fusion Center. E asina yama Fusion Ceter aki, ta cay directamente bou di supervision di Procurador General. Por bisa cu e lo e punto central di informacion y investigacion. E idea ta pa tur departamento guvernamental y no unicamente esnan hudicial, lo bay traha hunto cu otro y lo mester suministra tur informacion na e departamento aki, pa di un forma mas structura combati crimen organisa. Pues no ta un secreto, cu e mundo di crimen organisa continuamente ta keda busca manera di burla di autoridad. Como tal, e linea di pensamento semper lo keda, cu mester keda modernisa e forma di proceder pa gara e delincuentenan cu mucho mas facilidad, pero kedando semper den margen di leynan vigente.