Durante reunion cu e taxistanan, minister Romero di Transporte a acorda e tarifa nobo. Taxistanan ta uzando e mesun pricelist di 2009. Sra. Olinda Orman, di grupo di taxistanan ta amplia mas.
Taxistanan a duna nan motibacion pa e aumento di tarifa di taxista, cual minister a acorda. E minister a puntra e taxistanan pa haci esaki den un luna y tur dos partido a bay di acuerdo pa entrega e pricelist nobo, cu e % acorda. E lista a keda entrega dia 15 di mei. E siguiente reunion lo tabata pa celebra e acuerdo, pa cual nan a sali cu’n alivio cu porfin nan a keda cla. Si tabata tin par di polemica over di Uber. Despues lo mester a topa cu e minister bekcu e minister pa dia 8 di juni, pero e minister a biaha pa Colombia. Bureau di minister a keda di tuma contacto bek cu Sra. Orman, pero nan no a tende nada mas.
Despues nan a haya un yamada di Sr. Anuar Lacle, di Bureau di Minister Romero, ta yama Sra. Orman pa bis’e cu nan mester bay reevalua y renegocia e prijs, ya cu lo tabata tin un ‘mal comprondemento’. Pero Sra. Orman ta nenga esaki categoricamente. Nan a cumpli cu loke a keda acorda. Nan a keda di yama Sra. Orman bek, pero esaki tampoco a sosode.
Via BID Sra. Orman a manda un carta pa Minister di Transporte, cu despues Sr. Lacle a bisa Sra. Orman cu tin un grupo di taxistanan cu no kier un aumento, cual ta algo ilogico. Ta imposibel cu ta bay wanta tur e mayoria di taxistanan, pa un grupo chikito cu no ta di acuerdo. Ministerio di Transporte lo a keda di haci un encuesta entre e taxistanan, si nan kier e aumento si of no, via DTP. Ta trata di dos encuesta, cu lo bay puntra turistanan si nan ta di acuerdo cu e aumento. .
E grupo di taxistanan si lo bay aumenta nan tarifanan, ya cu esey tabata loke a wordo acorda. Por bisa cu nan tin un otro pricelist cu mester a cuminsa cun’e na Januari ultimo, pero door cu e minister no tabata na altura di tur e documentonan, cu si e pricelist tabata t’ey y cu si e tabata acorda, pero el a pone e taxistanan warda. Pero awo ta bin e aumento cu ta bay bin. Y e minister a aproba e aumento aki. Y nan no ta wak e dicon stop e aumento awo.
Nan no por wordo perhudica. Un opcion ta bay blokia caya, strobando trafico. Hopi biaha e minister a bisa cu e ta sinta na mesa, pa resolve e problemanan. E pricelist a wordo ahusta ultimo na 2009. Na 2007, a drenta e BBO na vigor. Na 2010, e BBO a bolbe subi. Dus, semper e pricelist a wordo ahusta despues cu cierto factornan ta pasa y door di esey nunca nan ta bay dilanti. Taxistanan ta traha demasiado pa ‘make it’. Mayoria trahado ta ora di haci compras nan ta paga e 6%. Pero e taxistanan ta pag’e directamente for di nan entrada, 12 pa 20 biaha, depende di e gastonan. Cada biaha cu bo haci un transaccion, bo mester pag’e atrobe. Bo tin Inkomstenbelasting, AOV, etc. Esey niun hende ta scapa di dje.
Por ultimo, e grupo di taxistanan a duna e minister chens pa sinta na mesa, pa resolve e asunto aki. Pa respet nan e yega di par’e y awo nan ta wordo ignora door di e minister. Y esey no ta algo responsabel pa haci.
Pa loke ta e “grupo di taxista” cu no kier aumento, tanten cu niun hende sali bin dilanti, bisa cu nan no kier, Sra. Orman e ta sigui bringa pa e aumento. Tanten cu e “grupo” ey nombra door di e Bureau di Minister, no bin dilanti, pa e grupo di taxista bringado pa e aumento, esakinan no ta existi, segun Sra. Olinda Orma, di e grupo di taxistanan bringado pa un aumento di tarifa.