Minister di Salud Dr. Alex Schwengle: “Si tur instancia den salubridad por tin un sistema di ICT lo haci nos maneho hopi miho”

Desde siman pasa a implementa un sistema digital nobo pa registra y analisa tur dato di pashentnan di Instituto Medico San Nicolas (IMSan). Minister di Salud Publico dr. Alex Schwengle a duna di conoce cu e ta hopi satisfecho cu awor IMSan tin un ICT System (Information & Communication System). Esaki tabata inclui den e presupuesto unda cu a dedica hopi tempo pa splica dicon data y informacion ta asina importante.
“No ta por nada mi tabata tin pelea cu cierto fundacionnan pa via di esey, pasobra e tin di haber cu placa, e tin di haber cu bo mester responsabilisa bo mes. No solamente como Minister pero tambe como pais na bo pueblo, ora bo ta uza placa pa cualkier proyecto”, e mandatario a subraya.
A ripara cu un gran problema den nos salubridad ta cu falta hopi data. E Minister a agrega cu e ta contento cu IMSan a tuma e iniciativa aki trahando cu un compania cu tin hopi experiencia, cual ta Factor y Surner. Hospital ta uzando Surner caba, a bisa y e experiencia ta bon. Sinembargo aworaki no ta e momento pa uni e mesun sistema di IMSan cu Hospital pero den futuro esey lo tuma luga si. Dado momento, Hospital hunto cu IMSan lo mester sinta hunto pa bay forma un famia conhunto, Minister Schwengle a duna di conoce.
“Si tur instancia den salubridad por tin un sistema di ICT y por duna nos un bon data, mi ta kere e lo haci nos maneho hopi mas miho”, a indica. Door di un database tambe por descubri unda placa ta bay perdi y drecha e sistema. Tin hopi cos pa drecha ainda na caminda, pero esaki ta un stap hopi importante y den bon direccion pa no solamente yuda AZV pero tambe gobierno pa hiba un miho maneho di salubridad aki na Aruba. E sistema aki lo duna IMSan posibilidad di por analisa tur faceta ora cu trata un pashent.

Comments

comments