Diamars mainta Minister di Salud Publico, Maneho di nos Grandinan y Deporte, Dr. Alex Schwengle a atende e caso di Sr. Minguel Koolman kende a fayece na Bogota. Esaki sigur ta un tema hopi delicado y pa e motibo aki Minister Schwengle a duna un splicacion amplio riba e procedura y ayudo cu a ser brinda na e famia.
Debi cu e caso aki a bira uno publico e mandatario a dicidi di bin dilanti y trece su declaracion. El a bisa cu ta trata di un caso lamentabel “y ta duel mi hopi loke e famia a pasa aden y kere mi no tabata un trayectoria bunita pa e famia”. Minister Schwengle tabata na altura di e caso pasobra e persona tabata su pashent prome cu el a tuma su posicion como Minister y su yiu di criansa ta traha cun’e, el a indica.
Ta bon pa subraya cu e declaracion cu un miembro di famia a duna tabatin partinan cu no ta berdad, Minister di Salud a splica. Minister Schwengle a laga sa cu e persona aki tabatin un enfermedad cu lastimamente no tin cura. A zorg pa e persona haya diferente opinion ora cu el a cuminsa su trayectoria como pashent cerca Dr. Schwengle. Su di dos opinion tabata cerca e suplente di Minister Schwengle. Despues a bin un profesor di Hulanda y a yega na e mesun conclusion. A bay Hulanda y e conclusion tabata e mesun: cu ta trata di un enfermedad cu no por cura, pasobra e ta comparabel cu un cancer terminal, Minister di Salud a expresa.
El a sigui bisa cu ta comprondibel cu e persona aki a dicidi di bay Colombia pa un otro opinion y wak si acaso tin algo tog cu por a haci p’e pa su salud. Den opinion di e mandatario, locual a sosode tabata riesgoso ya cu su pulmonnan tabata asina malo pa bay biaha. Tog nan a biaha y el a bira malo. A keda pega na Bogota y di eynan suppose cu mester a bay Cali. El a drenta “Intensive Care” y el a fayece.
Minister di Salud a agrega cu e famia a acerca AZV. Na momento cu AZV manda un hende afo pa un trato medico, segundo opinion of cualkier motibo, AZV ta cargu’e y pagu’e. “Si bo fayece den exterior, bao guia di AZV, nan ta zorg pa bo bin bek”.
E mandatario a aclaria cu “Na momento cu bo bay riba bo mes y si bo ta malo, cu un enfermedad hopi severo, bo ta core hopi riesgo y ta nifica cu bo mester prepara hopi bon. Bo mester zorg pa bo tin un bon seguro”. Minister Schwengle a subraya cu seguro no mester discrimina maske bo tin un enfermedad cronico. Lesa e papel di clausula di e seguro hopi bon prome cu firma tambe.
E mandatario a splica cu den e caso aki a tuma hopi riesgo, a bay busca un di 5 opinion na Colombia, cu tur comprension, e persona a bira malo y a bin fayece. A subraya cu banda di esaki lo entrega un keho contra e Hospital Engativá de la 80 na Bogota. Via embahada y Gobierno di Colombia lo entrega un keho contra e hospital.
Como Minister di Salud, el a splica, cu e ley di AZV ta prohibi’e di haci uso di e ley di AZV pa casonan asina. A busca manera pa yuda e famia y na final a haya sa cu via Sociale Zaken por a regla e asunto. Tur e tempo a tuma contacto cu Dienst Buitenlandse Betrekkingen, embahada y Gobierno Colombiano y nan a duna ayudo.
“Mi ta compronde y mi ta lamenta (…) pero esey no ta duna ningun hende derecho di gaña asina. Si bo no ta contento cu e proceso, mi ta compronde esey. Mi ta admiti, e proceso a dura hopi te na e momento cu nos a yega na e solucion pa yuda e famia”, e mandatario a expresa. E berdad ta cu si bo bay via AZV tur cos ta regla pero ora bo bay riba bo mes, ta masha poco cu Gobierno por haci.
No tin un protocol, ni un draaiboek pa e casonan aki. Hunto cu Minister President Mike Eman y Minister Paul Croes a keda palabra cu lo traha un protocol pa sigura cu den futuro e casonan aki por cana un tiki mas lihe, Schwengle a laga sa. E no ta kere cu di parti di Gobierno of AZV algo a bay malo. Loke si mester bay haci ta duna mas splicacion riba e hecho cu si bo dicidi cu bo ta bay afo cu bo enfermedad riba bo mes, esaki ta e cosnan cu mester tene cuenta cun’e.
Pa finalisa Minister ta manda condolencia na famia completo , consuelo den e momento di tristesa inmenso aki , caminda cu comunidad den su totalidad a ser conmovi cu e noticia y cu Minguel Koolman por haya descanso eterno den Reino Celestial.