Minister di Salubridad ta ricibi rapport cu conseho con pa reduci gasto

Representantenan di cuido medico ta sumamente orguyoso y satisfecho cu a completa e rapport di conseho basa riba e ultimo peticion di Gobierno di Aruba na fin di mei 2021.

Awe mainta a tuma luga entrega di e rapport aki na Minister di Salubridad, sr. Dangui Oduber compaña pa e representantenan Aruba su sector di cuido medico.

E encargo cu a Sali for di e Decreto Ministerial na e comision aki tabata pa ‘duna conseho en cuanto alternativanan con pa reduci gasto relaciona cu implementacion di e 5 wave model cu a ser traha pa UO AZV’.

E documento di conseho cu a otorga ta brinda alternativanan cu ta sigui e implementacion di e “AZV – 5 model”. E diferencia grandi di e conseho otorga compara cu e “AZV – 5 model” ta cu awo si ta mantene e calidad di cuido. Ya tin algun reduccion tumando luga riba corto plaso y e caracter structural di e reformanan ta pone cu riba termino largo e efectonan di reduccion pa Aruba lo ta mas ainda cu loke por ser logra cu e “AZV – 5 model”.

Sector di cuido medico kier enfatisa cu e cortamento di 60 miyon cu ainda tin riba cuido ta haci hopi daño riba e calidad di cuido na comunidad di Aruba. Tambe e ta nifica cu no tur cuido por wordo duna na comunidad di Aruba cu tur su consecuencianan cu esaki ta trece cu ne.

E documento di conseho aki ta demostra esey. Ta duna tambe oportunidadnan pa un miho cooperacion, sincronisacion, eficiencia y inversion pa mehoracionnan structural dentro di e sector. Y tambe pa medio di un colaboracion mas extenso cu AZV y Gobierno por hiba Aruba na ta un isla mas saludabel.

E sector di cuido medico ta mira e conseho aki como un comienso pa un cambio fructifero den e organisacion di e sistema di cuido na Aruba. Asina den futuro tin un Aruba medico y financieramente saludabel pa tur Arubiano y e sector turistico cual ta esencial.

Durante otorgamento di e documento, minister Oduber a gradici sr. Ronnie van Trigt como presidente independiente di e comision y tambe tur partner den cuido pa nan empuhe y confiansa.

Comments

comments