Minister encarga cu salubridad ta Sr. Dangui Oduber y a comenta cu el a haya un carta for di e director di AZV cu ta trece dilanti cu tin debenan habri. Minister Oduber a comenta cu Gabinete Eman pa motibo di iresponsabilidad no ta traspasa e BAZV tur e primanan cu ta wordo paga pa aseguradonan cu ta bay den caha di Gobierno. Tin un ley tambe cu mester wordo traspasa pa AZV, y asina AZV hiba su maneho y cubri e gastonan medico.
Mes un caso unda 4 pa 5 luna AZV no ta haya su placa y Gobierno na e momento aki debe AZV 46 miyon florin. Si wak bon, e ministerio cu Minister Dangui ta maneha, su departamento (gobierno) debe ATA 22 miyon florin y AZV 46 miyon cu ta casi un 70 miyon florin adicional cu tin bay busca un manera pa yega na e fondonan aki pa cubri e gasto aki.
Minister Dangui Oduber a bisa kico e director di AZV ta bisa den su carta dirigi na e Minister di Salubridad textualmente, cu AZV no tin placa pa paga su gastonan y e.o hospital. Minister Oduber a bisa con mas iresponsabel bo por ta como Gobierno saliente di laga un situacion asina aki pa e proximo Gobierno, si nan mes lo a gana e eleccion nan mes lo a hereda e situacion.
“Ta di lamenta con un gobernante ta maneha e pais aki y bo ta laga ATA den cifranan cora y pais Aruba caba ta conoci den debe grandi y a laga e pais den bancarota y na werki, y ta iresponsabel. Mi persona ta haya cu ta necesario pa trece esaki dilanti na comunidad pasobra e mes un hendenan aki ta hiba oposicion awe y cu e pensamento cu un dia nan lo desea di bin bek den gobierno. Un gobierno asina aki hamas y nunca por haya e oportunidad mas pa drenta gobierno”. Asina Minister Dangui Oduber a comenta.