Diaranson ultimo, Minister di Turismo, sr. Otmar Oduber, a ricibi un carta di Partido RAIZ den cual nan ta toca e tema di posibel construccionnan ilegal andando na Savaneta.
Minister Oduber a duna di conoce cu el a contesta e Partido rib’ e puntonan treci dilanti y a tene un rueda di prensa den cual el a pidi Departamentonan di DOW y DIP pa haci un control na Savaneta. Segun e Minister, a constata cu no tin actividad andando actualmente pasobra tin algun luna caba cu ta sintando na mesa cu desaroyadornan pa mira kico tabata e intencion, kico ta e permisonan cu tin, kico ta e condicionnan den cual e momentonan aki peticionnan ta wordo haci pa por haya e permisionan necesario.
E Minister ta sigui splica cu e raport di DOW ta mustra rib’e hecho cu ta trata di discucionnan cu a tuma lugar caba for di 2016 y 2017, caminda e construccionnan cu tin actualmente tabata existi desde e tempo ey caba. E hecho ta cu construccionnan a tuma lugar sin permiso, pa cual a para tur trabou cu tabata tumando lugar. E desaroyadornan a mustra cooperacion pa cu esaki y sinta na mesa pa mira kico e impacto ta pa locual a tuma lugar. A tuma na consideracion e peticionnan cu nan a dirigi na Gobierno pa mira si esaki tin un impacto riba medio ambiente.
Ademas, e Minister a mustra cu mester cumpli cu tur e rekisitonan, cual ta inclui un estudio di impacto medio ambiental, si nan kier continua cu e proyecto di contruccion.
Regardando preguntanan tocante e proyecto di Isla di Oro, Minister Oduber ta agrega cu e ta sigui sostene e concepto di e proyecto cu mester a bin na Isla di Oro y e concepto actual di e negoshi cu kier wordo crea na Savaneta. E Minister ta sinti cu ta algo positivo pa e desaroyo economico di Pais Aruba, pero cu e condicion cu evita cu proyectonan asina no haci daño na e medio ambiente.
Esey, segun e Minister, ta e motibo cu a stop e proyecto di Isla di Oro, pero ta sostene e posibilidad pa continua cun’e na un sitio mas adecuado.
Minister Oduber ta sigura cu awor mester bay cumpli cu estudionan necesario p’asina e proyecto di construccion na Savaneta por continua.