Minister di Labor, drs. Paul Croes ta cataloga e dia di ayera, como un dia historico pa nos pais. Pa prome bes Aruba tin su propio refineria. Aruba y Arubianonan ta bay dirigi un refineria, cual antes nunca tabata e caso. “Awe nos pais por ta orguyoso cu refineria di Aruba ta un modelo, cu nos ta bay lease cu CITGO, pero cu ta di nos pais,” asina Minister Croes a comenta cu hopi alegria.
“E logro aki ta resalta e esfuersonan grandi cu a wordo hinca den e strategia, den e pensamento, den negociacion continuo, den e anochinan sin drumi pa nos por logra esaki. Gobierno, dirigi pa un Prome Minister cu nunca a perde speransa den e proceso aki y semper a confia den Minister Mike de Meza, a logra reapertura di refineria,” Minister Croes a bisa adicionalmente.
Pa e titular di Labor, banda di e impacto economico di 15% di bo GDP, banda di e impacto financiero cu ta pa presupuesto di nos pais, banda di e impacto monetario cu esaki ta nifica entrada pa e pais en general y banda di e impacto di comercialisacion rond di e refineria; naturalmente ta e impacto laboral ta hopi importante.
“Nos lo tin cupo di trabou pa nos Arubianonan un biaha mas por traha na e refineria. Na tur e ciudadanonan, e oportunidad t’ey y nos kier apoya bo den esaki. Esey ta e motibo pakico a institui e CITGO Desk, pa nos por haya curiculo di diferente persona cu ta interesa, cu ta capacita y cu tin e estudio pa traha den e refineria. Banda di esaki, mi mester bisa cu e institucion di e Scol Tecnico caminda hobennan ta caba diferente estudio tecnico, ta trece oportunidad tambe pa traha den refineria. Esaki ta un ‘win-win-win situation’ di tur banda.”
Por ultimo, Minister Croes ta felicita pueblo pa nunca a perde speransa. E no tin duda cu nos ta construyendo un pais solido, un pais cu ta bayendo dilanti. Esaki ta un biaha mas muestra di e trabounan grandi cu ta wordo haci pa e gobierno aki. “Mi ta felicita nos conciudadano, nos pais, felicita Gobierno di Aruba pa e logro grandi aki y manera mi a bisa, a bira momento pa bisti e cover all y prepara pa trabou.”