Despues cu diabierna ultimo por bisa cu oficialmente porta di e refineria a keda habri, mester para keto y analisa cu ta trata di un logro sumamente importante pa cu futuro desaroyo di nos pais tanto pa e aspecto economico, financiero, laboral y social di Aruba. E logro aki ta refleha e trabao incansabel cu Gobierno di Aruba a bin ta haci pa varios luna caba reuniendo cu ehecutivonan di CITGO pa haci e apertura aki uno posibel. Awor, pa prome biaha den historia di nos pais, Aruba ta bira doño di su propio refineria. Banda di esaki por bisa cu contratonan sera cu CITGO ta pa un termino largo di minimo di 15 aña cu ta sigura stabilidad pa nos pais. Minister Croes ta duna di conoce cu e apertura aki lo trece cune mas di 2500 cupo di trabou unda cu nos localnan lo tin e prioridad pa haya un trabou den e refineria. E refineria ta representa un impacto economico di 15% di nos GDP cu ta hacie sin duda un pilar fuerte economico di nos pais. Banda di e impacto financiero esaki ta nifica entrada pa e pais en general y banda di e impacto di comercialisacion rond di e refineria e aspecto social tambe ta uno cu nos no por lubida. E refineria lo trece bienestar y lo yuda eleva calidad di bida di tur ciudadano.