Willemstad Curacao: Minister di Hustisia Quincy Girigorie pa medio di Dekreto Ministerial ta instalá Komishon di Investigashon i Evaluashon relashoná ku desaparishon di un kantidat di droga ku a keda konfiská i tabata wardá den un kompleho di Polis na Rio Canario dia 14 di òktober último.
Inmediatamente despues di a keda notifiká tokante e insidente ku a tuma lugá dia 14 di òktober último, kaminda deskonosínan a hòrta un kantidat di droga for di e kompleho polisial na Rio Canario, Ministerio Públiko a kuminsá ku un investigashon penal den e kaso en kuestion, pa por identifiká i persiguí esnan kulpabel di e delito aki.
Minister di Hustisia a konsiderá ku aparte di un investigashon penal, ta sumamente importante pa hiba un investigashon atministrativo, pa asina evaluá si e prosedura indiká pa konfiskamentu, wardamentu i distrukshon di artíkulonan; den e kaso aki un kantidat di droga, a ser siguí korektamente i si esaki ta e kaso, pa evaluá a la bes si e prosedura aki ta faktibel òf si e lo mester keda revisá pa evitá ku den futuro un insidente asina lo por ripití su mes.
E komishon a haña komo tarea pa evaluá tur proseso, prosedura i akuerdonan ku tin pa ku
artíkulonan ku keda konfiská, for di momento di konfiskashon te na momento ku e artíkulo keda entregá pa keda destruí. Tambe e komishon a risibí komo tarea pa presentá rekomendashonnan den esaki pa ku e prosedura en kuestion.
Miembronan di e komishon aki ku mester reportá na Minister di Hustisia ta señor mr. F. Dandare, señor mr. R. Antonius MBA i señora. mr. S. Inderson. Despues di risibí dokumentashon final di e investigashon i evaluashon aki, e titular di Hustisia lo por informá tantu Parlamento komo komunidat kon e proseso den e kaso spesífiko aki a tuma lugá i kiko ta loke por a bai robes den esaki.
Basá riba e resultado di e investigashon ariba menshoná, Minister di Hustisia lo por evaluá
tumamentu di pasonan nesesario pa ku esnan ku segun e prosedura indiká ta responsabel pa e artíkulonan konfiská ku a keda hòrta i lo konsiderá tur rekomendashon pa ku kambio, ahuste i òf mehorashon di e prosedura aki pa ku kasonan similar den futuro.