For di aña pasa caba a cera un contract cu Ontario Principals Council pa provee training special na tur lider di scolnan na Aruba. Diabierna e di 4 grupo y ultimo, grupo di cabesantenan di scol preparatorio, basico y secundario a completa e curso y lo ta trahando riba nan tarea final, esta un proyecto personalisa pa nan mesun scol.
ISL ta e abreviacion pa “International School Leadership” y ta un programa cu ta yuda lidernan di scol den diferente fase pa yega na solucion y plannan pa soluciona retonan y eleva nan scol pa e siguiente nivel.
Minister Michelle Hooyboer-Winklaar a comenta cu el a haya hopi bon “feedback” di tur e gruponan. E reaccion en general tabata similar, unda cu e cursistanan ta expresa cu e instrumentonan cu nan a haya ta hopi valioso y a habri nan wowo y mente pa cierto cosnan cu mester conoce cambio.
E titular di enseñansa a subraya cu e proceso di cambio y introduccion di diferente aspecto nobo den enseñansa no ta un asunto cu ta simplemente tuma luga “top-down”, esta cu e ministerio ta bisa cu nan mester bin y esey ta loke ta pasa tambe. Tin diferente proceso cu mester tuma luga pa medio di colaboracion estrecho, mester traha riba nan hunto y introduci nan hunto, den e grupo ta yega na conclusionnan y como grupo ta carga e decisionnan tambe. Colaboracion ta sigui ta e tema central.
Un otro aspecto cu ta tene cuenta cun’e ta cu desaroyo profesional mester ta continuo, Minister Hooyboer-Winklaar a bisa. El a agrega cu un di oportunidadnan cu lo ta sondeando ta kico e posibilidad ta pa esunnan cu a completa e ISL na Aruba por sigui e siguiente fase cu ta wordo ofreci na Ontario, Canada. E posibilidad aki mester wordo evalua y ta algun di e lidernan lo por bay Canada. Actualmente e ta ainda simplemente algo cu ta wordo explora y lo mester traha riba dje pa determina si e por keda realisa.