Recientemente Minister di Enseñansa y Deporte Endy Croes a reuni cu
mayornan concerni riba e preocupacion di e desaroyo cu ta tumando luga den algun scol,
specialmente scol basico riba e introduccion di ideologia di genero.
7 di December un grupo di mayor preocupa a tene un rueda di prensa y a trece luz riba un tema
cu ta drentando nos sistema educacional. Ta trata aki di e introduccion di ideologia di genero.
Un rueda di prensa cu sigur a hala atencion di e pueblo y por a mira e respaldo di pueblo.
Manera a splica, e proposito di educacion di mucha na scol ta pa desaroya nan inteligencia
cognitivo. Por ehempel atraves di educacion natural objectivo, desaroyo di lenguahe,
conocemento general, historia, ciencia comproba y tur locual tin di haber cu esakinan. Tur esaki
hunto cu disciplina, responsabilidad y compromiso cu ta yuda e mucha pa den futuro bira un
adulto cu por funciona exitosamente den sociedad y contribui economicamente na nos pais. Ora
bo ta papia di ideologia di genero, bo ta papia di un creencia subhetivo.
Un creencia subhetivo ta locual un persona ta opina personalmente di un situacion cu no ta basa
riba un berdad objectivo.
Mirando e urgencia y e gravedad di e situacionnan cu a ocuri, despues di e rueda di prensa,
mayornan a sigui cu nan di dos stap y a manda un carta pa Minister di Enseñansa Endy Croes pa
asina por elabora mas riba e topico.
Minister di Enseñansa Endy Croes a tuma contacto inmediato cu mayornan concerni Grushenca
Arends y Cindy Lacle y a reuni pa elabora mas ariba diferente punto y preocupacion di mayornan.
Minister Endy Croes a splica, cu e topico di ideologia di genero no ta den e curriculum y a tuma
accion inmediatamente poniendo un stop na esaki den scol nan di DPS.
Minister a elabora riba e problema social alarmante cu tin na scol y cu mayoria biaha docente
mester interveni y duna un man no solamente cu un desayuno pero tambe cu sosten emocional
cual ta di admira. Pero na e otro banda a wordo comproba cu musica por tin un influencia riba
comportacion di un mucha. E pregunta ta bira, con por ta posibel cu tin asina un problema social
grandi y na scol basico ta permiti musica vulgar, cu ta papia di droga, alcohol, sexualidad,
mensahenan negativo y dobel sinti? Un caminda nos mester cuminsa. Ban cuminsa na e cosnan
chikito pa asina nos por crea un snowball effect.
Pa finalisa manera mayornan concerni a vocifera. Esaki no ta un topico cu nan lo debati.
E ta keda e derecho y responsabilidad di e mayor pa educa nan yiu riba creencia subhetivo.
Na momento cu un persona kita e derecho aki di un mayor bo ta viola e derecho di e mayor.
Na tur mayor, wela/o, tanta/omo y e persona cu a puntra con bo por uni na e causa aki, ta
importante pa monitoria e les cu e mucha ta ricibi na scol. Na momento cu bo tin un duda, sinti
liber di yama e cabesante di scol y trece esaki dilanti.
Nos sigur lo keda monitoria e situacion aki di cerca.