Minister di Asuntonan Social, Hubentud y Labor drs. Paul Croes a mustra cu e enfasis riba mas inclusion y menos discriminacion pa personanan cu limitacion den nos sociedad ta keda riba su lista di prioridad. Ta enfoca riba e varios instancia y fundacionnan cu ta trahando pa e grupo di meta aki y ta reenforsa esakinan mas.
Varios ta e fundacion cu ta atende, cuida y apoya personanan cu limitacion na Aruba. Segun censo di 2010 tabatin alrededor di 7.000 persona cu tin un of otro limitacion riba nos pais. Pa 2015 e calculo ta cu esaki lo por a yega 8000 persona. Na mas cu un ocasion Minister Paul Croes a mustra cu participacion di e grupo aki den desaroyo di nos pais ta hopi importante.
“Pa cuminsa mester kibra e tabu na momento di discuti riba personanan cu limitacion. Mester expone e realidad pa asina nos comunidad acepta mas ainda e hecho cu tin personanan diferente na nos bibando hunto cu nos. Pero mester realisa tambe cu e personanan aki NO ta menos cu nos tampoco. Si bo ta considera un persona special como menos, esun cu tin e problema ta abo”, asina Minister Paul Croes a mustra enfaticamente.
Durante e siman aki lo tin algun anuncio importante unda lo fortifica e sector social importante aki na beneficio di tur ciudadanonan cu ta conoce un of otro limitacion. Varios ta e instancianan manera entre otro Funari, SVGA, FAVI, Ambiente Felis y Ambiente Nobo, Cas Shabururi, Sonrisa y Trampolin pa Trabou cu ta dedica na mucha y personanan special den nos comunidad.