Minister di Asuntonan Social Sr. Glenbert Croes, a expresa su compromiso pa atende e problematica cu actualmente lo ta enfrentando e comunidad. Minister Glenbert Croes ta elabora ariba esaki.
Hopi ta e barionan na Aruba cu mester di hopi ayudo social, cerca tur e famianan cu lo ta pasando den pobreza, violencia domestico, adiccion of maltrato, cu lo mester apoyo pa lanta den nos sociedad. Minister di Asuntonan Social, Sr.Glenbert Croes a expresa cu e ta un trabou den conhunto y cu ta bay tin cooperacion di e 28 fundacion cu ta cay bao di su ministerio, pero sin conta cu e otro fundacionnan, departamentonan cu lo cay den e diferente ministerionan, manera di Husticia, Enseñanza , Salud y Finanza, entre otro cu tin un gran responsabilidad tambe. E minister a enfatiza cu tin hopi problemanan di ayudo social cu ta bin dilanti, pero cu tin hopi mas scondi, unda cu lo por tin mucha cu lo ta pasando den sufrimiento of violencia y cu lo mester rescata.
Asina tambe Minister Glenbert Croes a bisa cu lo ta hopi gradici cu e cooperacion di minister di Finanza, Sra. Xiomara Ruiz Maduro cu a aproba e presupuesto pa Casa Cuna cu lo tabata tin 6 aña largo den espera cu un conflicto di placa cu tabata tin mester, anto e la wordo aproba pa cuminsa realisa e cambio cu tin adecua. Mane awor aki nan ta cuminsa cu e proyecto “mama jong” (tienermoeder), cu lo ta trata di yuda tur e mamanan cu a haya yiu na jong y no tin experiencia ni ayudo di e tata. Tambe por lanta otro proyectonan, bai di Casa Cuna na Imelda Hof, anto cu tur e mucha lo por lanta den un bon ambiente cu siguridad.
Finalmente minister Glenbert a conclui cu e la bisa cu e meta lo ta por hiba e muchanan bek na su circulo familiar bek, fortifica e structura di e famia cu mester sanea, cu mayor balornan, siguridad, amor y cariño. Esaki ta un esfuerso grandisimo pero e ta e meta cu nan ta spera por cumpli den e 4 añanan cu tin pa logra mustra na e pueblo na final, haci algo diferente pa logra un resultado diferente y por duna na Aruba un miho biba, asina e Minister di Asunto Social,Sr. Glenbert Croes a conclui..