Diamars mainta Conseho di Minister a reuni na San Nicolas Store caminda e ministerraad a tuma lugar hunto cu varios inversionista presente. Pa Minister di Turismo y Salud Publico Sr. Dangui Oduber esaki ta hopi importante den cuadro cu e masterplan cu tin pa San Nicolas. E mandatario a haci hopi proyecto pa San Nicolas den su prome termino como minister y kier continua cu su bon trabou den e gobernacion di 2021-2025.
Durante gobernacion di Gabinete Wever-Croes 1 Minister Oduber a ehecuta varios proyecto den cuadro di e vision y masterplan pa San Nicolas. Den esaki a inclui e proyecto di Baby Beach fase 1 y 2 (fase 1 ya caba a wordo entrega), a inclui e renobacion di e Oficina di Turismo na San Nicolas. A introduci e festival cultural di Island Fest cu lamentablemente mester a para temporalmente door di e pandemia. A renoba e pier na Rodgers Beach y dentro di poco e proyecto di renobacion di e trapi na Rodgers Beach tambe lo cuminsa. Mescos cu a sosode na e proyecto di Baby Beach tambe ta planea pa pasa na Rodgers Beach.
Minister Oduber a sigui bisa cu Gobierno ta kere cu San Nicolas tin e potencial pa bira un segundo capital turistico di Aruba. Pesey Minister Oduber lo bay sigui inverti tambe den e oficina di Turismo di San Nicolas. Minister Oduber su vision y maneho pa e sigiuente 4 añanan di gobernacion, lo bay enfoca mucho mas riba e turismo niche. Esaki nan ta e turistanan di “low volume high impact”, e turistanan cu tin un entrada anual di mas di 150 mil dollar pa aña.
Minister Oduber a zorg tambe pa haci e inversion necesario na ImSan pa por a finalisa e proyecto di radioterapia y tambe percura pa ImSan haya 22 cama cu por wordo usa pa shortstay hospital. Un inversion di mas di 60 miyon florin. Minister Oduber ta enfoca hopi tambe pa den e periodo di gobernacion aki cristaliza e JCI accreditation pa ImSan. Na momento cu esaki keda cla ImSan por sigui crese y na mes momento ta habri porta tambe pa turismo medico.
Minister Dangui Oduber a enfatisa cu Aruba ta conoci como un distinacion di calidad y pa mantene e espectativa aki mester keda haci inversionnan pa atrae mas inversionistanan. Turismo ta keda e driver principal di nos economia.
