E unico interes cu tin Lotto ta pa resolve e problema ta pa e bienestar di deporte y por haya e fondonan cu ta necesario pa por ehecuta e maneho di e minister actual. Tin un grupo manera un cartel cu a empodera nan mes di Lotto, cu ta kere cu e nan tin e beheer di e fondonan cu ta wordo genera door di e benta di lotto pa haci y deshaci y comete abuso. Minister di Deporte Sr. Dangui Oduber cu e desaroyo.
Asina ta cu e grupo aki a contrata den corte e miho y e abogado mas caro di Reino cu ta cobra entre 1000 y 1500 florin pa ora, anto ta puntra pakico e afan di keda bringa cu e gobierno pa keda sinta di e manera aki pa perhudica deporte.
Minister a haya pruebanan cu ta den poder di gobierno y a wordo presenta den presupuesto, anto ora ta bin compronde e motibo pakico e hendenan aki no kier y tin miedo pasobra cu investigacion a cuminsa tuma luga. Lo yeg na e raiz dicon e Lotto a wordo maneha den e ultimo 8 añanan.
Actual director di Lotto a presta su mes e tempo ey como miembro di hunta di e directiva y a yega di haci uzo di su mesun compania di accounting pa paga su mes. Tabata tin circunstancianan caminda e mes ta bay Lotto entrega e check y e mes ta ricibi e check anto e mes ta cobre tambe.
E compania aki a keda cobra218 mil florin den un aña di servicio na e hunta di directiva di Lotto y a y tur e pruebanan di esaki a wordo presenta pa Minister den Parlamento anto durante cuatro aña ta calcula cu a wordo kita for di deporta 1 miyon florin siendo cu nan tabata paga caba pa nan ehecuta nan trabou cu nan ta eherce.
Banda di esaki e personanan aki ta cobra 600mil florin pa aña anto cada un di e miembro individualmente a haci uzo di e fondo cu ta wordo genera pa deporte pa haci negoshi cu Lotto. Tin un a duna servicio di accounting, un di abogado, un IT, otro a huur e edificio di su mes y tur esaki cu placa di deporte.
Ora a constata esaki a wordo manda un carta na e hunta di directiva actual bisando cu esaki ta contra tur regla di bon gobernacion y cu no ta etico. Segun e minister, ta mescos cu si e como minister por lanta un compania di consultancy y ademas di anti etico ta cay bou un conflicto grandi di interesnan particular.
E personanan envolvi den esaki no tin ni un denuncia riba nan , siendo cu e reglanan di Corporato Good Governance, cu ta bisa cu tur NV’s di gobierno tin reglanan di bon gobernacion, anto net e abogado cu ta representa Lotto den actualidad ta Profesor Kuddeman cu ta conoci como dunado di charlanan tur caminda y a skirbi un buki di Good Governance con pa bestuur y maneha na momento cu nan ta wordo apunta como miembro di un Hunta di Directiva ki comportacion mester tin y kico mag y kico no mag di haci.
Ora un hende ta lesa e bukinan di e autor aki, algo cu semper ta bin dilanti ta cu ora bo ta miembro di un hunta di directiva, no mag di mal uza e poder y bo no mag di duna bo mes contractnan. Pero e Hunta di Directiva aki a duna nan mes contract. Ora cu a manda un carta pa e Hunta di Directiva, pidinan splicacion, bisando cu e no ta etico y por wordo considera coruptivo ya cu no por haci esaki cu fondonan di deporte.
Pa sorpresa di Minister Dangui Oduber e mesun profesor cu ta abogado di Lotto a contesta gobierno cu legalmente locual cu nan ta haci ta den margen di ley y cu segun statuutnan ta permisibel.
Si esaki ta e caso e ora ta habri e caminda pa cualkier miembro di cualkier hunta directiva haci mesun cos pasobra esaki a bira normal. Biniendo for di gobernacion di AVP unda tur e situacion ta normal y ta legal, unda cu e Minister ta diferencia di opinion cu e profesor aki y p’esey Minister a dicidi di bay den corte.
A señala tambe cu e personanan aki a bay asina leu cu nan lanta un otro caso unda ta prohibi na e Minister pa bolbe kita nan, y esaki no ta e caso sino cu nan ta den proceso pa purba destitui nan caba. A cuminsa cu un bodem procedure cual lo bin dilanti te December. Pero e minister no kier warda asina hopi, siendo cu e deportista ta bay wordo perhudica. P’esey ta den proceso ya caba cu un plan B pa yega, cual e minister no kier a anticipa ariba esaki pa yega na un solucion unda cu deporte no ta wordo perhudica. Ta inacceptabel cu tin un fundacion cu statuut ta brinda e oportunidad pa kita e miembronan di kita e miembronan di Raad van Toezicht y gobierno ta nombra miembronan pa ehecuta su maneho luga cu nan ta keda bringa cu un abogado asina caro di 1500florin pa ora cu ta ranca placa di deporte.
Esaki ta e situacion fastioso caminda cu gobierno ta boga pa un bon maneho y pa cambionan tuma luga. Tin henter un maneho pendiente pero tempo ta coriendo y no tin tempo pa keda warda riba sentencia di huez. P’esey ta bezig caba cu plan B cual lo wordo anuncia den e proximo simannan, segun minister di Salud Publico, Deporte y Turismo, Sr. Dangui Oduber.