Turismo ta keda e fuente principal di entrada pa nos pais. Pa e motibo aki, ta importante pa nos mantene nos producto Aruba uno competitivo. Pa Minister Dangui Oduber, como e mandatario encarga cu Turismo, e vision ta pa Aruba ricibi turista di calidad. Pesey e ta di sumo importancia pa keda inverti den areanan turistico y tambe inverti den infrastructura.

“Ora nos kier atrae e asina yama ‘big spendernan’ cu ta laga hopi placa atras den nos economia, ta importante cu nos producto y e experiencia cu nos ta brinda ta cuadra cu cantidad di placa cu nan ta paga pa nan estadia. E turista mester haya balor pa nan placa”, Minister Dangui Oduber a expresa.

Den cuadro di esaki, minister Dangui Oduber ta anuncia diferente proyecto cu sigur lo eleva nos producto Aruba.

Proyecto Baby Beach y Rodger’s Beach
Como un area turistico super bon bishita, Baby Beach, na e area caminda Lone Palm Stadium ta situa lo bay conoce facilidadnan nobo manera baño, café/restaurant y zona di recreacion. Tambe lo bay amplia e parkinglot den e area aki. Rodger’s Beach lo haya un pier nobo y tambe lo haya facilidadnan nobo pa publico por haci uzo di dje.

Proyecto Trapi Malmok
Un di Aruba su hoynan ta e area Malmok. Na e area aki construi diferente trapi
na e costa (barancanan) pa asina e lama por ta mas accesibel pa nos turistanan y localnan.

Proyecto Stashi Alto Vista
E kapel di Alto Vista ta un sitio hopi bishita y ta sagrado. E ta un caminda hopi ta bin haci oracion, meditacion y hopi devotonan catolico ta haci uzo di dje. E kapel ta ser bishita practicamente tur dia pa nos turistanan y pa e motibo aki lo bay renoba e 14 stashinan di e caminda di cruz pa Alto Vista.

Proyecto Boardwalk Malmok
Tanto turista como local ta haci ehercicio riba e strip di Malmok, pero no ta gosa di un siguridad optimal na e sitio. Pa e motibo aki lo construi un boardwalk, cual lo ta di entre Fisherman’s Hut y Boca Catalina. E boardwalk lo garantisa siguridad di tur esnan cu lo haci uzo di dje. Pa construccion di e boardwalk, a tene cuenta pa por tin menos impacto
ambiental posibel, door di construi sin haci daño na naturalesa.

Proyecto Hooiberg
Un di Aruba su atraccionnan principal cual ta un regalo di naturalesa ta Hooiberg. E sero aki a wordo neglisha pa hopi aña y ta den mal estado. Por medio di fondonan di TPEF lo percura pa drecha esaki. E idea dreche y hunto cu artistanan local, crea un arte di mosaic, haciendo e area aki uno unico den su forma.

Comments

comments