Un biaha mas Ministerio di Deporte ta informa ariba e avancenan regardando e proyectonan di renobacion di facilidadnan deportivo. E proyecto di artificial turf na veld di Kudawecha ya tin varios tempo andando y por bisa cu esaki ta den su fase final di entrega.
Aworaki por mira cu e veld di Kudawecha a wordo “leveled” y a instala un “drainage system.” Tur esaki pa mehoracion di e infrastructura di e veld. Tambe a renoba e dugout y ta cla pa haci uzo di dje. Manera ta conoci caba na aña 2019 veld di Kudawecha a ricibi su luznan LED. Pues dentro di poco deportistanan tin un veld completamente renoba pa continua cu nan deporte.
Minister demisionario Dangui Oduber a bisa di ta sinti su mes hopi orguyoso di por a realisa e proyecto aki den bario di Kudawecha.
Ministerio di Deporte ta keda enfatisa cu deporte ta un instrumento importante pa nos pais. E ta percura pa entre otro un bida mas saludabel, tanto fisico como mental, e ta tene hobennan leu di delincuencia y ta siña nan disciplina. Sin deporte, un nacion no tin bida.
Minister Dangui Oduber a haci inversionnan necesario y pa e siguiente termino di gobernacion tin e compromiso pa sigui traha na bienestar di deporte.