Diahuebs merdia Minister di Salubridad Publico Sr. Dangui Oduber a bay ImSan pa un ceremonia di e 500 pashent cu a haya radioterapia na e hospital na San Nicolas. Ainda por recorda cu dia 2 di april di aña 2020 e afdeling di radiotherapia a trata nan prome pashent y na 11 di november di aña 2020 e di 100 pashent. Un proyecto exitoso cu Gobierno a kere aden, a pone fondonan disponibel cu awor ta dunando su fruto.
Henter e masterplan di expansion di ImSan a cuminsa oficialmente na april di aña 2018 y tabata un inversion grandi di 60 miyon florin. Den e masterplan a percura pa bin cu un departamento di radiologia cu su CT-Scan, a bin cu un departamento di policlinica di wowo caminda ta haci operacion di retina. A construi salanan di operacion cu mashinnan avansa, cu ImSan su mesun anestesista pa asina haci operacionnan ey mes. Tambe a bin cu un departamento pa sterilisacion di ekiponan medico y converti ImSan den un hospital di estadianan corto cu 22 camber. A bin cu un “Spoed Eisende Hulp” cu cambernan pa ricibi ambos adulto como mucha y claro sin laga afor e departamento di Radiotherapia.
Esaki a nifica cu pashentnan residencia aki na Aruba no mester bai mas den exterior pa esaki. Esaki ta significa cu e pashentnan lo keda den su seno familiar. Na mes momento esaki lo reduci e costonan di AZV pa cu pashentnan cu ta wordo manda den exterior pa tratamento di radiologia. Tambe a percura pa pone 1 miyon florin di AZV disponibel pa percura pa e cambernan den ImSan bai den uzo pa pashentnan por pasa anochi na e hospital. Di e manera aki Gobierno ta keda mustra cu hechos cu e ta kere den e desaroyo di San Nicolas.
Nos maneho di salud publico ta dirigi riba mehora e calidad di cuido y servicio. Cu e logro aki nos ta logrando mehoracion den cuido pa nos hendenan. ImSan su vision y su desaroyonan pa cu cuido medico ta cuadra cu e vision di Gobierno di Aruba cu ta pa mehora e calidad di cuido na Aruba y como tambe crea un plan sostenibel pa Aruba pa asina e fondonan di AZV ta sostenibel pa den futuro.
Minister Dangui Oduber den nomber di Gobierno kier felicita e visionario Dr.Joel Rajnherc y full team di ImSan Aruba y partners Di Miami Cancer Institute y Baptist Health. Awe ImSan a marca historia un biaha mas.
E “milestone” aki ta uno historico pa cuido medico y cu nos tur na Aruba mester ta orguyoso di dje.
Nos ta transformando cuido medico na Aruba pa un mihor cuido, calidad y servicio. Nos ta tratando mas pashent na Aruba mes. Nos ta kere den e desaroyo di San Nicolas. Cu accionan y decisionan concreto nos ta logrando cambionan positivo pa cuido medico na Aruba.
