E maneho di ministerio di turismo ta dirigi riba e turismo di calidad, e turista afluente, e turista cu ta bin gasta hopi placa. Ora nos a drenta gobierno, nos a cambia e target, antes e enfoke tabata riba e turista cu tin un entrada anual di 100 mil dollar y awo e ta 150 mil dollar.
Banco Central a emiti su rapport di tourism receipt pa aña 2018, esaki ta duna un indicacion cuanto placa e turista a laga atras den nos economia. Noticia positivo ta cu durante aña 2018 e tourism receipt a conoce un aumento di 8.2 %. Tourism receipt a conoce un crecemento den cantidad di placa di 270 miyon florin.Den su totalidad e tourism receipt a conoce un crecemento di 3.6 biyon florin den nos economia.
E indicadornan di e cifra di sector hotelero tambe ta duna e mesun indicacion.
E revenue per available room ta na 302 dollar pa camber pa anochi, den e periodo di januari pa maart 2018. Esaki ta un crecemento di 6.6%. Aña pasa e tabata na 283 dollar. Esaki ta un indicador cu ta turista di calidad ta bin nos isla.
E grado di ocupacion ta 90%, kiermen cu 9 di cada 10 camber ta ocupa. Turismo ta keda e pilar economico di nos isla. Nos ta gradici tur esnan cu ta labora den e sector aki, tur nos parteners, nos stakeholders.
Cantidad di turista ta keda crece. E reto ta pa mantene e nivel pa 2020 y 2021. Un nivel nunca antes conoci, un crecemento asina positivo.