Dialuna mainta Minister di Turismo y Salud Publico sr. Dangui Oduber a duna un conferencia di prensa na Palm Beach caminda e mandatrio a anuncia cu e toren y plataforma na Palm Beach lo wordo drecha. Manera otro proyectonan cu ta andando rond di nos isla, esaki tambe ta un proyecto cu den cuadro di embeyecimento y mehoracion di producto Aruba. Esaki ta e toren cu ta situa net dilanti di Riu Antillas Hotel cu ta wordo masha bishita pa nos turistanan y localnan.
Minister Oduber a recorda pueblo cu ya caba na aña 2018 a drecha esaki un biaha, cual a wordo realisa en conhunto cu Riu Hotel cu a pone mitar di e fondo cu tabata necesario e tempo ey. Lamentabelmente e trabounan cu a wordo haci pa drecha e toren e tempo ey no a dura mucho. Door di mal tempo y actonan di naturalesa un biaha mas e toren ta den un mal estado y mester wordo drecha. Pa e motibo aki Ministerio di Turismo conhuntamente cu Aruba Tourism Authority a busca e fondonan necesario pa drecha e toren y plataforma aki. E biaha aki lo usa materialnan cu lo bai tempo mas largo.
Den e proyecto aki ta bay construi un plataforma nobo den un estilo di octagon caminda na cada skina lo bay tin trapi. Lo acerca artistanan locual cu lo mester haci un obra di arte bunita riba esaki. E proyecto aki ora e ta cla lo bira un otro atraccion pa nos turistanan caminda nan por saca potret y pone esakinan riba media social cu sigur lo sirbi como mercadeo y promocion pa Aruba como destinacion. Sigur un otro bunita proyecto chikito pero cu tin un impacto grandi.
Turismo ta keda e driver di nos economia y pesey ta sumamente importante pa nos keda inverti den producto Aruba. Minister Oduber ta sigui percura pa drecha y embeyece diferente areanan turistico riba nos isla. Aruba ta di nos ban conserve.
