Minister Dangui Oduber: Maneho hiba ta dunando resultado cu turismo creciendo y Aruba recuperando!

Minister di Turismo, Salubridad Publico y Deporte Sr. Dangui Oduber a hiba un maneho hopi progresivo y innovativo cu a pone cu Aruba a bira un “trendsetter” na mundo. E programa di vacunacion di pais Aruba ta un strategia di recuperacion exitoso y a keda reconoci internacionalmente como un di e mihonan di mundo. Esaki a haci cu Aruba ta conociendo crecemento den nos sector turistico cu ta surpasa tur proyeccion segun cifranan di ATA.

Turismo na Aruba ta creciendo, ya caba ta 2 luna tras di otro cu Aruba ta ricibiendo 20% mas bishitante cu e luna prome cu ne, esaki sigur ta algo sumamente positivo pa Aruba. Pa varios siman caba Aruba ta poni riba e codigo geel pa biaheronan for di Hulanda, esaki ta haci cu mas y mas Hulandes por bin disfruta di nos dushi isla y nos hospitalidad cu nos ta conoci pe.

Danki na e strategia di recuperacion di Minister Oduber hopi turistanan a regresa nos isla bek. Durante e periodo di  januari y april 2021 Aruba a ricibi mas di 171 mil turista. Den luna di mei Aruba a ricibi mas di 70 mil turista y den juni ta premira alrededor di 75 mil turista. Desde Juli 2020 cu Aruba a habri su frontera nos a ricibi alrededor di 310 mil turista segun e cifranan di ATA.

Segun Minister Dangui Oduber e grado di recuperacion den e prome mita di aña 2021 ta 55% compara cu e prome mita di aña 2019. Ta proyecta cu e grado di recuperacion den su totalidad den aña 2021 ta 67% compara cu aña 2019 ora cu ainda e cifranan no a wordo afecta pa e pandemia. Esaki ta un bahada di 33%. E mandatario a duna di conoce cu segun proyeccionnan di ATA, e turismo di Aruba lo recupera completamente na aña 2023. E cifranan aki ta mustra con accelera Aruba su recuperacion ta bayendo, esaki ta pone cu Aruba ta liderando Caribe (Top 5) den e distinacion cu ta recuperando mas liher di e crisis mundial segun “Caribbean Tourism Organization” (CTO).

“Aruba ta progresando y awor ta momento pa stabilidad y no aventura,” Oduber a bisa.

Minister Dangui Oduber ta hopi satisfecho con e vacunacion a bay na Aruba. Den esaki Aruba ta den e top mundialmente ora ta papia di cobertura di e vacunacion. Na e momentonan aki a vacuna alrededor di 66 mil hende caba riba e edad di 18 aña. Esaki ta 67% di e poblacion (18+) cu a ricibi nan vacuna. Esaki a conduci cu e cifranan di covid a baha substancialmente desde luna di mei. Danki na tur esnan cu a vacuna Aruba poco poco ta bayendo bek na normalidad.

Recientemente Minister Oduber tabata di bishita na Hyatt Regency Aruba caminda e mandatario por a mira tur e inversionnan cu a wordo haci y alabes combersa cu e GM y e empleadonan pa gradici nan pa nan excelente servicio cu nan ta brinda na nos turistanan. Aruba su turismo ta recuperando hopi liher y esaki ta danki na e vision cla cu Minister Dangui Oduber a pone nos dilanti. Aruba ta ricibiendo 75.000 turista den luna di juni 2021 y e grado di ocupacion di Hyatt ta 90%.

“Aruba ta progresando y awor ta momento pa stabilidad y no aventura,” Oduber a bisa.

Comments

comments