Minister Dangui Oduber: Despues di 10 aña e estudio den enfermeria den salud mental (MGZ) lo continua bek

Diahuebs 14 di maart Minister di Salubridad Publico sr. Dangui Oduber tabata presente na Directie Volks Gezondheid (DVG) pa anuncia comienso di e estudio di Maatschappelijke Gezondheidszorg (MGZ). E estudio di MGZ lo resorta bou maneho di Sociaal-Psychiatrische Dienst (SPD). E estudio aki tabata scondi den e lachi di ex mandatarionan pa 10 aña y a perhudica nos profesionalnan di progresa. Awor Minister Dangui Oduber si lo bay ofrece e posibilidad pa haci e estudio di HBO-verpleegkundige dunando balor na nos profesionalnan den enfermeria.
Minister Dangui Oduber a duna di conoce cu e ta hopi satisfecho cu Aruba por brinda su profesionalnan e oportunidad pa haci e opleiding di HBO-verpleegkundige aki na Aruba mes. Nan tin e oportunidad pa mehora nan mes profesionalmente, sin cu mester bandona Aruba. Esaki ta un otro paso den mehoracion di e calidad di e cuido pero tambe e seguridad di cada asegurado, cual ta un di metanan principal pa e Ministerio di Salubridad Publico. Apesar cu gobierno a hereda un situacion financiero caotico, a presupuesta 200 mil florin den aña 2019 pa e estudio. Di e manera aki gobierno ta duna atencion real na e cuido di salud mental poniendo e ser humano central.
E estudio riba su mes lo ta riba e nivel di HBO y lo tin un duracion di 2 aña. Cu e estudio aki e enfermera/o di MBO nivel 4 por por specialisa den cuido di salud mental. Esaki ta un specialisacion cu ta haci hopi falta aki na Aruba. E estudio aki lo wordo realisa na e edificio di DVG.
Finalmente Minister Dangui Oduber ta sigura e comunidad cu di e maneranan aki lo sigui haci esfuerso pa mehora e calidad di cuido na Aruba. E Mandatario a trece dilanti cu lo bay sigui inverti den nos profesionalnan paso nan ta e weso di lomba di Salubridad Publico.

Comments

comments